Sjónvarpskokkurinn Rachael Ray og eiginmaður hennar beita óvenjulegri aðferð til að viðhalda jafnvægi í hjónabandinu. Frá þessu greindi Ray í hlaðvarpi sínu, I’ll Sleep When I’m Dead.

Eiginmaður hennar er tónlistar- og lögmaðurinn John Cusimano.

„John er lögmaður og tónlistarmaður. Ég er enginn tónlistarmaður og ég er klárlega enginn lögmaður. Ég hata að lesa lögfræðileg skjöl og opinbera pappíra en við jöfnum hvert annað út með undarlegum hætti. Við leyfum hvoru öðru að vera opin fyrir ólíkum sjónarmiðum.“

Ray útskýrir að þau deili hugsunum sínum hvort með öðru af hreinskilni, alveg sama þó þau viti fyrir fram að það gæti leitt til ágreinings. „Mér finnst gaman að geta tjáð hug minn allan“

Ray hefur áður greint frá því að þau hjónin passi að gefa hvoru öðru rými. Stundum þurfi þau frið hvort frá öðru. Þau trúa heldur ekki á það að forðast ágreining. Vissulega geti það verið erfitt þegar bæði eru skapmikil og hávær.

„Ég og John róum okkur aldrei niður. Við öskrum reglulega á hvort annað en mér finnst það hollt. Í alvörunni. Ég treysti ekki fólki sem fer of lítið fyrir. Fólk sem er of hljóðlátt stressar mig. Ég vil frekar að þú segir mér hvað þér finnst þegar hugsunin kemur og bara hleypa þessu öllu út.“

Að sjálfsögðu eru þau með óvenjulega leið líka til að gera upp ágreining.

„Ég held að við biðjum hvort annað aldrei afsökunar. Að lokum klappa ég honum á hnéð, eða hann kyssir mig á kollinn og þá er þetta búið. Það er afsökunarbeiðnin. Við bara einhvern veginn skiljum það.“

Hjónin gengu í það heilaga árið 2005 og endurnýjuðu hjúskaparheit sín árið 2015. Svo þótt þetta sé kannski óvenjulegt, þá virðist það virka. Í það minnsta fyrir þau.