Það var hátíðisdagur framundan hjá Dýr­ley Dröfn Karls­dótt­ur á laugardaginn, útskrift með BA-gráðu í dönsku frá Háskóla Íslands. Dýrley stillti sér upp í röð útskriftarnema og steig þolinmóð skrefi framar við hvert nafn sem lesið var upp.

Það sem á eftir kom var þó frekar óþægileg og stressandi upplifun, en mögulega þó mjög eftirminnileg og tilefni til að segja margoft frá í framtíðinni. Í myndbandi sem Dýrley birti á TikTok má sjá að þegar Dýrley er næst í röðinni og á von á að nafn sitt verði lesið, er nafn útskriftarnemans á eftir henni lesið og svo koll af kolli. Þar sem Dýrley stígur til hliðar, þá verður smá vandræðagangur á sviðinu.

Mbl sagði frá atvikinu fyrr í dag og segir Dýrley að lesin hafi verið upp nöfn allra þeirra sem voru að útskrifast með BA í ensku áður en leyst var úr hennar máli.

„Ég var að út­skrif­ast með BA-gráðu í dönsku og var ein í þeim flokki þannig ég var al­veg lúmskt viðbúin því að eitt­hvað kæmi upp á, að ég myndi detta eða eitt­hvað. En síðan gerðist það að þau gleymdu í raun­inni að segja nafnið mitt. Þegar ég var búin að standa þarna eins og illa gerður hlut­ur í ein­hverj­ar mín­út­ur fékk ég á end­an­um nafn­laust skjal og upp­skar því­líkt lófa­tak. Það var ekk­ert smá óþægi­legt.“

@thelittlelesbian_ What are the odds of this happening to me, out of the 2700 graduates 🥲 #fyp #foryou #iceland #university #graduation #lgbtq #lesbian #queer #viral #funny #sad ♬ The Benny Hill Show – The Edwin Davids Jazz Band

Þegar Dýrley kom niður af sviðinu var hún beðin að koma baksviðs þar sem í ljós kom að skír­teinið henn­ar var í bunkanum upp á sviði. Var henni boðið að fara aftur upp á svið og taka við útskriftarskírteininu, en hún afþakkaði það.

„Þetta lýs­ir nám­inu ágæt­lega því það er ekk­ert mik­il aðsókn í BA-nám í dönsku og allt mjög frjáls­legt. Það að ég hafi fengið skír­teinið mitt baksviðs var í raun­inni punkt­ur­inn yfir i-ið á náms­leið minni,” segir Dýrley við Mbl.

Hún segir að nokkrar ástæður geti legið að baki þessum mistökum: hún hafi verið ein að út­skrif­ast með BA-gráðu í dönsku og sú sem var á und­an henni í röðinni hafi verið að út­skrif­ast með tvö­falda BA-gráðu. Háskólinn er búin að biðja Dýrley afsökunar á þessum mistökum.