Prinsessan Katrín og eiginmaður hennar, Vilhjálmur Bretaprins, eiga ekki sjö dagana sæla. Þetta segir Amaia Arrieta sem hefur starfað sem stílisti fyrir fjölskylduna í nokkurn tíma og nýtur trúnaðar þeirra.

„Ég er miður mín sem stendur, ég held að þau séu að ganga í gegnum helvíti, ég vona að þau komist til baka. Þetta er mjög persónulegt,“ sagði Arrieta í samtali við Telegraph.

Stílistinn útskýrði ekki nánar í hverju raunir hjónanna felast, en Katrín er sem stendur að gangast undir fyrirbyggjandi krabbameinsmeðferð eftir að æxli var fjarlægt úr kvið hennar í ársbyrjun. Eins hefur umræðan gengið nærri fjölskyldunni sem og ásætti milli bræðranna Vilhjálms og Harry. Breskir miðlar hafa jafnvel vísað til heimilda með að Katrínu sé nú viljandi hlíft við fjaðrafokinu og dramanu sem gjarnan fylgir Harry og konu hans, Meghan Markle. Enda þurfi hún alla sína krafta í að ná heilsu.

Til stóð að Katrín kæmi aftur til starfa eftir páska. Nú er þó útlit fyrir að prinsessan taki sér ótímabundið leyfi á meðan hún hugar að heilsunni.