Vinurinn og leikarinn Matthew Perry lét lífið í október, en hann lést skyndilega langt fyrir aldur fram, eða aðeins 54 ára að aldri. Leikarinn hafi áratugum saman háð erfiða baráttu við fíknisjúkdóm, sem líklega átti hlutverk í endalokunum. Margir nánir leikaranum voru harmi slegnir enda hafði Perry nýlega gefið út endurminningar sínar og samhliða tekist að vera edrú í tvö ár. Ætlaði leikarinn að fagna þessum áfanga með því að stíga aftur inn í sviðsljósið og greindi opinberlega frá spennandi verkefnum framundan. Nú væri seinni hálfleikur lífsins að hefjast og að þessu sinni ætlaði leikarinn að spila rétt úr þeim spilum sem honum voru gefin.
Þessir draumar urðu að engu þegar leikarinn fannst látinn í heita pottinum á heimili sínu í Kaliforníu. Dánarorsökin tengdist notkun leikarans á efninu ketamíni, sem hann hafði fengið uppáskrifað til að berjast við þunglyndi. Leikarinn hefði fengið lyfið í sérstökum tímum með heilbrigðisfagfólki sem stýrði skammtastærðum, en líklegt er talið að leikarinn hafi orðið sér úti um meira af efninu og notað ótæpilega þvert að læknaráði.
Nú hefur þó athygli verið vakin á því að leikarinn átti sér skuggahlið. Hann hafi komið hryllilega fram við fólkið sem stóð honum næst, logið að bæði vandamönnum og almenningi – en sífellt reynt að mála sjálfan sig sem fórnarlamb. Vissulega hafi fíknin leikið leikarann grátt, en á sama tíma þýddi ástandið að fáir þekktu leikarann í raun og veru.
Heimildarmaður sem þekkti til leikarans segir í samtali við US Magazine að leikarinn hafi aldrei tekist við rætur vanda síns. Hann hafi verið með djúp sár á sálinni og notað vímugjafa til að losna undan einkennum, en ekkert gert til að uppræta vandann fyrir fullt og allt. „Hann tókst á við þetta með því að einangra sig. Hann hafði það fínt peningalega séð og þurfti ekki að vinna, það skapaði kjöraðstæður fyrir neyslu.“
Miðillinn hefur það frá þremur ólíkum heimildum að leikarinn hafi í raun aldrei verið edrú, heldur hreinlega logið því. Hann hafi falið neyslu sína og ekki bara hana heldur eins aðra hegðun sem ekki þoldi dagsins ljós.
„Hann beitti andlegu, tilfinningalegu og líkamlegu ofbeldi,“ segir einn heimildarmaður sem segir leikarann sjúklega stjórnsaman. „Það eina sem hann kunni var að valda sársauka og spila sig sem fórnarlamb.“
Annar heimildarmaður segir að Perry ekkert skrímsli, en hann hafi þó verið svo langt leiddur af fíkn að hann hafði týnt sjálfum sér og þeim manni sem hann átti með réttu að vera. Tveir þriggja heimildarmanna segja að misnotkun Perry á vímugjöfum hafi orðið til þess að í mars árið 2022 hafi hann ráðist á leikarann Morgan Moses, besta vin sinn til fjölda ára og félaga í edrúmennsku. Leikarinn hafi orðið brjálaður þegar hann var sakaður um að vera undir áhrifum. „Hann henti Moses í vegg og kastaði einhverju í hana, og fleygði henni svo á rúmið. Þarna gekk hann lengra en að bara hóta ofbeldi heldur beitti því í reynd. Hann sagði samt sem áður við hana – Ef ég ætlaði mér að meiða þig þá hefði ég gert það.“
Eftir þetta hafi Moses verið fljót að koma sér í burtu frá leikaranum og þegar rann af honum varð Perry miður sín yfir atvikinu. Hann hringdi í sameiginlega vini og bað þá um að miðla sættum milli hans og Moses.
„Hann var í kvíðakasti því þessi manneskja sem stóð alltaf við bakið á honum var núna farin,“ segir einn heimildarmaður og bætti við að Moses hafi reynt að komast yfir þetta, en ekki tekist það.
„Morgan var besti vinur hans og hann brenndi vinskapinn til grunna. Hann ýtti henni alveg á ystu nöf. Allir vildu honum vel en hann var bara hryllilegur á móti. Hann varð bálreiður yfir minnstu hlutum og sneri svo öllu á hvolf til að mála sig sem fórnarlamb. Hann gerði allt verra bara svo hann gæti sagt – Aumingja ég, ég var sár og þú yfirgafst mig. Hann lét fólk ganga með sér í gegnum helvíti.“
US Magazine greinir frá því að dæmin séu fleiri. Fyrrum kærasta leikarans, sem var rétt komin á þrítugsaldur þegar þau voru saman, hafi árið 2020 hótað leikaranum lögsókn sökum andlegs ofbeldis sem hann beitti hana. Hún hafi gengið svo langt að ráða einvala lið lögmanna sér til aðstoðar. Hún sagði Perry ofbeldisfullan og að hann hafi látið hana ánetjast fíkniefnum, þar á meðal oxycodone og verkjalyfjum.
Perry og þessi fyrrverandi kærasta hafi átt í sundur-saman sambandi um langt skeið og sambandið verið stormasamt. Þau kynntust í meðferð en það var ekki fyrr en hún byrjaði með Perry sem hún prófaði opíoíða og fíkniefni. Eins hafi valdamunur falist í aldursmun parsins sem gerði leikaranum kleyft að misnota sér yfirburði sína. Málið rataði þó ekki fyrir dóm þar sem Perry ákvað að bjóða henni sáttargreiðslu gegn því að hún undirritaði svokallaðan NDA-samning sem meinar henni að ræða samband þeirra opinberlega.
Af öðrum dæmum nefnir US Magazine að eitt sinn hafi hjúkrunarfræðingur sem starfaði fyrir leikarann sagt upp störfum og hreinlega hætt alfarið að leggja stund á hjúkrun því hún fékk svo mikið áfall í starfi sínu fyrir leikarann. „Hann var grimmur. Hann þurfti að borga sálfræðitíma fyrir fjölda kvenna og skildi eftir sig slóð eyðileggingar.“
Neyslan varð eins til þess að Perry stefndi sjálfum sér og öðrum ítrekað í hættu. Hann hafi ekið bifreið sinni undir áhrifum og lent þannig í slysum. Sem betur fer hafi enginn beðið af því bana, en það sé heppni að þakka en ekki leikaranum.
Perry hafi eins verið ósáttur við feril sinn og hversu erfitt hann átti uppdráttar í Hollywood eftir að Friends-þættirnir hættu göngu sína. Honum hafi eins og mörgum dreymt um börn og fjölskyldu og var bitur yfir því að vera kominn á miðjan aldur án þess að hafa tekist að láta þann draum rætast.
Heimildarmenn telja að þrátt fyrir að fyrrum meðleikarar hans úr Friends tali gjarnan eins og þau hafi verið öll nánir vinir fyrir utan tökustað, þá hafi þau í raun aldrei þekkt Perry almennilega. Þetta sé augljóst af eftirmælum þeirra þar sem þau mæra leikarann og lýsa honum sem góðum manni. Þau hafi aldrei fengið að sjá hans rétta andlit, enda hafi Perry logið að þeim.
„Hann bar mikla virðingu fyrir þeim, en hafði ekki alltaf jákvæða hluti að segja um þau. Hann var með minnimáttarkennd gagnvart þeim, og þegar hann baktalaði þau þá var það út af hans eigið óöryggi,“ segir heimildarmaður og bætir við að Perry hafi verið afbrýðisamur út í meðleikara sína fyrir að glíma ekki fíkn. Raunin sé sú að Perry hafi notið gífurlegrar velgengni og haft öll tól í hendi sér til að breyta heiminum til hins betra. Hann hafi þó misst allt úr höndum sér sökum fíknisjúkdómsins sem hafi með tíð og tíma gert hann að grimmum og sjálfhverfum manni.
