Ástralska stórleikkonan Nicole Kidman vann Óskarsverðlaunin árið 2003. Hún virtist vera á toppi tilverunnar en raunveruleikinn var annar. Hún var að ganga í gegnum mjög erfiða tíma á bak við tjöldin.

Nicole Kidman var valin besta leikkona í aðalhlutverki fyrir leik sinn í myndinni The Hours.

Hún og leikarinn Tom Cruise voru nýlega skilin eftir ellefu ára hjónaband. Kidman var 35 ára þegar hún vann Óskarinn og brotnaði niður þegar hún hélt þakkaræðuna.

„Þetta var hápunktur ferils míns en einkalíf mitt var í molum. Það er það sem gerist, er það ekki?“ segir hún um þennan tíma í lífi sínu í bókinni 50 Oscar Nights eftir Dave Karger.

Þrátt fyrir að hafa unnið verðlaun vildi Kidman bara fara heim þetta kvöld. „Ég er ekki mikið fyrir partýstand þannig ég ætlaði að sleppa Vanity Fair eftirpartýinu og fara bara heim og upp í rúm. En allir sögðu að ég þyrfti að fara og ganga um með styttuna.“

Leikkonan segir að hana hafi ekki langað að gera það en hafi látið undan þrýstingi og mætt í smá stund.

„Ég bókstaflega labbaði inn, hélt á styttunni, þetta var allt svo yfirþyrmandi og tilfinningaríkt, ég skalf öll og naut þess ekki. Ég var nánast byrjuð að biðja fólk afsökunar, sem er svo heimskulegt. Ég vildi óska þess að ég hefði notið þess betur að vera þarna,“ segir hún.

„Ég fór heim, pantaði mat og borðaði það á gólfinu á hótelherberginu mínu.“

Kidman segir að hún hafi farið ein að sofa fyrir miðnætti. „En ef ég vinn aftur þá ætla ég að skemmta mér í 24 tíma.“