Leikarinn Elliot Page segir að hann og meðleikkona hans, Olivia Thirlby, hafi átt í leynilegu ástarsambandi á tökustað kvikmyndarinnar Juno, sem kom út árið 2007.

Elliot lék aðalhlutverkið, Juno MacGuff, og Olivia Thirlby lék bestu vinkonu Juno.

„Það sló mig alveg út af laginu, augnablikið sem ég sá Oliviu Thirlby í fyrsta sinn,“ skrifar leikarinn í nýju sjálfsævisögu sinni, Pageboy.

Elliot segir að þó hann og Olivia hafi verið jafngömul þá fannst honum leikkonan hafa verið „miklu eldri, klárri og hæfari.“

„Kynferðislega opin, á svo allt öðrum stað en ég var á þeim tíma. En neistinn var áþreifanlegur, ég dróst að henni.“

Leikarinn segir að þau hafi byrjað að eyða miklum tíma saman og eitt kvöldið voru þau inni á hótelherbergi Oliviu. „Hún horfði beint á mig og sagði hreint út: „Ég laðast mjög mikið að þér,““ skrifar hann í bókinni.

Elliot sagði að honum liði eins, og þar með hófst ástarsamband þeirra.

„Löngun mín í hana var alltumlykjandi. Hún lét mér líða eins og mér hafði aldrei liðið áður. Þetta var eitt af fyrstu skiptunum sem einhver lét mig fá fullnægingu, fyrsta sinn sem ég gat opnað mig,“ segir hann um samband þeirra.

Hann segir að þau hafi byrjað að stunda kynlíf allan liðlangan daginn og út um allt.

Elliot tilkynnti að hann væri trans í desember 2020. Hann er þekktastur fyrir leik sinn í kvikmyndunum Juno og Inception og hefur einnig slegið í gegn í Netflix-þáttunum Umbarella Academy.

Olivia kom út úr skápnum sem tvíkynhneigð árið 2011. Hún hefur verið gift leikaranum Jacques Pienaar síðan árið 2014.