Í samtali við New York Magazine opnaði Drew sig um samband hennar við móður sína, Jaid Barrymore, og erfiða æsku. Hún sagðist öfunda vini sína sem áttu svipaða æsku en tókst að vinna úr áföllum sínum eftir að mæður þeirra féllu frá.
„Mömmur þeirra eru farnar en ekki mamma mín. Og ég er alveg: „Jæja, ég hef ekki þennan lúxus.“ En ég get ekki beðið,“ sagði hún.
„Ég vil ekki lifa þannig lífi að ég vona að einhver fari fyrr en þeim er ætlað, bara svo ég geti vaxið sem manneskja. Ég vil að hún sé hamingjusöm og heilbrigð. En ég þarf að fokking vaxa þrátt fyrir tilveru hennar á þessari jörð.“
Drew, 48 ára, byrjaði ung að leika og var fræg barnastjarna. Jaid var umboðsmaður hennar og fór með hana í partý í Hollywood og á klúbba eins og Studio 54. Unga leikkonan ánetjaðist fíkniefnum og var 12 ára þegar hún fór fyrst í meðferð. Þegar hún var 13 ára vistaði móðir hennar hana inn á geðdeild í eitt og hálft ár.
„Ég fór á skemmtistaði, fór ekki í skólann, stal bílnum hennar mömmu og ég var stjórnlaus. Stundum var það bara þannig, og stundum var ég svo reið að ég missti mig og var síðan hent inn í [bólstraða herbergið],“ sagði Drew við Howard Stern árið 2021. Hún var látin dúsa í herberginu í marga klukkutíma á meðan hún „jafnaði sig“, stundum með hendurnar bundnar fyrir aftan bak.
„Ég held að [mamma] hafi búið til skrímsli og ekki vitað hvað hún ætti að gera við það,“ sagði hún.
Þegar leikkonan var 14 ára losnaði hún undan forræði foreldra sinna (e. emancipated).
Drew tjáði sig um viðtalið á Instagram í gær og bað fólk um að taka ekki orð hennar úr samhengi. „Ég sagði aldrei að ég vildi óska þess að mamma mín væri dáin. Ég hef aldrei sagt það og myndi aldrei segja það,“ segir hún.