Ásdís Rán Gunnarsdóttir kom, sá og sigraði glamúrfyrirsætubransann hér á landi. Ferill hennar náði nýjum hæðum eftir að hún flutti til Búlgaríu árið 2008. Tveimur árum síðar var hún á forsíðu Playboy og segir að við það hafi orðið ákveðin straumhvörf í hennar lífi. Hún segir frá þessu í lífsstílsþættinum Fókus.

„Sko ég held að Playboy hafi verið „breaking point“ í lífi mínu. Það var einhver standard sem ég var að stefna að. Ég var búin að ná forsíðunni á Maxim þá, búin að vera eitthvað í FHM líka. Þetta var eitthvað sem ég var svolítið hrædd við, því ég vissi að það kæmi að þessu. Ég var búin að vera með þetta tilboð á borðinu í tvö ár þangað til að ég ákvað að gera það, og það var bara samkomulag hjá mér og Garðari að ég myndi gera þetta og hann vildi að ég myndi gera þetta,“ segir hún.

Á þessum tíma var Ásdís gift knattspyrnumanninum Garðari Gunnlaugssyni.

Það skipti miklu máli fyrir hana að myndirnar yrðu fágaðar og fallegar en í gegnum tíðina hefur hún hafnað mörgum tilboðum sem hefðu farið yfir ákveðin mörk og farið gegn ímyndinni sem hún hefur unnið hörðum höndum að byggja upp.

Aðspurð hvað tilboð frá Playboy, árið 2010, hafi verið mikið segir hún:

„Heyrðu, þetta var alveg mjög fínn peningur sem ég fékk. Ég bætti um betur út af því að ég gerði samning við Eymundsson. Ég keypti öll blöðin í Búlgaríu og lét senda til Íslands og seldi Eymundsson þau helmingi dýrari. Þannig ég græddi alveg nokkrar milljónir á þessu. Ég ætla ekki að segja alveg hversu mikið.“

Hún segir nánar frá myndatökunni í myndbandinu hér að ofan. Horfðu á þáttinn í heild sinni hér.

Fylgstu með Ásdísi Rán á Instagram, Facebook og hlaðvarpsþætti hennar, Krassandi konur, á YouTube.