Sonur fréttamannsins Snorra Mássonar og Nadinar Guðrúnar Yaghi, samskiptastjóra flugfélagsins Play, er kominn í heiminn.
Um sannkallaðan fjölmiðladreng er að ræða því áður en Nadine fór að vinna hjá Play hafði hún getið sér gott orð sem fréttamaður hjá Stöð2, Bylgjunni og Vísi og unnið til blaðamannaverðlaunanna. Gerði hún svo gott betur árið 2021 þegar hún lauk meistaranámi í lögfræði við Háskóla Íslands og hlaut verðlaun fyrir bestu lokaritgerðina.
Snorri hefur getið sér gott orð sem fréttamaður á Stöð2 en hann stýrði einnig vinsælu hlaðvarpi sem nefndist Skoðanabræður ásamt bróður sínum Bergþóri. Nýlega var greint frá því að Snorri ætli að halda á ný mið og verður spennandi að sjá hvað tekur við hjá þessum unga efnilega manni.
Nadine og Snorri hnutu um hvort annað snemma á síðasta ári og drengurinn þeirra er fyrsta barn Snorra en annað barn Nadinar. Parið trúlofaði sig í desember síðast liðnum.
Fókus óskar þeim til hamingju með viðbótina.