Vigdís Hafliðadóttir tónlistarkona vakti mikla athygli í byrjun árs með hljómsveitinni Flott og lagi þeirra Hún ógnar mér. Boðskapur lagsins er að konur þurfa ekki að rífa hvor aðra niður til að taka pláss, en það er einmitt hvimleið tilhneiging í samfélaginu að bera konur í sama geira sífellt saman og þannig stilla þeim upp á móti hvor annarri. Í myndbandi lagsins kemur fram hópur þekktra kvenna hvaðanæva úr atvinnulífinu.

Ljóst er að Vigdís lætur aðra tónlistarmenn heldur ekki ógna sér því í þræði á Twitter vekur hún athygli á íslenskri tónlist á Spotify, tónlist sem einhverja hluta vegna hefur ekki fengið þá athygli sem hún á skilið að mati Vigdísar.

„Vanmetin íslensk tónlist. Þráður! Það er svo mikið af vönduðu og góðu efni á Spotify sem hefur ekki farið á flug. Allt hér er með undir 20.000 spilanir, oftast undir 10.000 og jafnvel undir 1000,“ segir Vigdís.

„Þetta fallega lag er með um 3000 spilanir. Passar hæglega á á alla lista með rólegri tónlist,“ segir Vigdís um Sóley frá síðasta vori – Tríóið Fjarkar.

„Ólafur Bjarki er að gera mjög spennandi hluti og allt unnið með topp tónlistarflokki. Ekkert lag er með meira en 1000 spilanir,“ segir Vigdís um Tvímælalaust – Ólafur Bjarki.

„Sjúklega töff lag með Salóme Katrínu. Tónlistarkona sem hefur unnið allskyns verðlaun og er með mest í kringum 20.000 spilanir,“ segir Vigdís um The Other Side – Salóme Katrín.

„Löv&Ljón gaf út æðislega poppplötu árið 2019. Ég ber örugglega ábyrgð á svona 3000 af þessum 19.000 spilunum. Hef sent þessi á fólk sem ég þekki og öllum finnst þau geggjuð,“ segir Vigdís um Svífum.

Vigdís hvetur aðra til að taka þátt í þræðinum:

„Það má bæta fleiru við! Punkturinn minn er að það er langt frá því sjálfgefið að fá spilanir og það getur verið bilað hark. Þó að lag sé ekki með mikla hlustun þýðir ekki að það sé lélegt. Það eru ótal þættir sem spila inn í að því gangi vel á Spotify.“

Nokkrar ábendingar bárust um fleiri lög og gerði Vigdís lagalista á Spotify, Vanmetin íslensk tónlist.

Þess má geta að Flott gaf nýlega frá sér lagið L´amour og á leikarinn Ólafur Darri Ólafsson innkomu í laginu.