Ferðavefur CNN segir frá því í dag að flugfélagið Air New Zealand muni frá og með 31. maí, að skipun flugmálayfirvalda Nýja Sjálands, vigta alla farþega sem fara með millilandaflugi flugfélagsins frá flugvellinum í Auckland á Nýja Sjálandi. Mun vigtunin standa yfir til 2. júlí næstkomandi.
Flugfélagið, sem er í meirihlutaeigu nýsjálenska ríkisins, kallar þetta könnun á þyngd farþega. Markmiðið er sagt vera að safna gögnum um þá þyngd sem flugvélar félagsins þurfa að bera og hvernig hún dreifist.
Séfræðingur flugfélagsins segir könnunina nauðsynlega til að reikna út meðalþyngd bæði farþega og áhafna. Almennt sé allt vigtað sem fari um borð í en þegar kemur að manneskjum sé notast við meðaltalsútreikninga.
Segir í umfjöllun CNN að vigtunin verði ekki tengd við nafn hvers og eins farþega og þyngdartölur verði ekki sýnilegar starfsmönnum á vettvangi.
Farþegar flugfélagsins í innanlandsflugi voru vigtaðir árið 2021 en vigtunin fyrir millilandaflugið fer fyrst fram núna vegna áhrifa Covid-heimsfaraldursins.