Söngvarinn Nick Jonas, sem gerði garðinn frægan með bræðrum sínum í hljómsveitinni Jonas Brothers, rifjar upp verstu sviðsframkomu sína sem var svo slæm að hann þurfti að leita sér sálfræðiaðstoðar í kjölfarið.
Hann greinir frá þessu í hlaðvarpsþættinum Armchair Expert.
Árið 2016 kom Nick fram á ACM verðlaunahátíðinni ásamt söngkonunni Kelsea Ballerini. Hann segir að hann hafi tekið „virkilega slæmt gítarsóló“ á meðan þau fluttu lagið Peter Pan.
„Eftir á að hyggja get ég hlegið að þessu, mér fannst þetta svo mikið mál þá,“ segir hann og bætir við að hann hafi þurft að leita til fagaðila eftir atvikið.
En hvað gerðist eiginlega? Nick getur ekki svarað því.
„Ég hafði æft þetta lag milljón sinnum og var mjög öruggur […] Lagið byrjaði og allt var í góðu, svo þegar ég gekk í áttina að henni þá var ég skyndilega alveg tómur og ég spilaði vitlausa nótu. Ég bara algjörlega datt út og gat ekki hætt að klúðra,“ segir hann.
„Enn þann dag í dag, eftir að hafa eytt mörgum klukkustundum í að reyna að skilja hvað klikkaði, þá er ég engu nær.“
Hér að neðan má sjá umrætt gítarsóló. Fyrri hluti myndbandsins er lagið eins og það á að vera, seinni hluti myndbandsins er upptaka frá verðlaunahátíðinni.