Kviðdómur hefur komist að niðurstöðu í máli sem læknir á eftirlaunum, Terry Sanderson, höfðaði gegn leikkonunni Gwyneth Paltrow vegna skíðaslyss sem átti sér stað árið 2016.

Sanderson hafði farið fram á rúmar 428 milljónir í skaðabætur og sagði að Paltrow hefði borið ábyrgð á slysinu sem hafi valdið honum miklu tjóni, þá sérstaklega varanlegum heilaskaða sem hafi skert lífsgæði hans. mikið.

Paltrow gagnstefndi lækninum og hélt því fram að það hafi í raun verið hann sem olli slysinu og fór fram á 1 dollara í táknrænar bætur. Lögmenn Paltrow færðu rök fyrir því fyrir dómi að læknirinn væri aðeins á höttunum eftir peningum þar sem hann hefði áttað sig á því að Paltrow væri efnuð og fræg. Væri hann að ýkja tjónið sem hann hafi orðið fyrir og líklega megi rekja skert lífsgæði hans til hækkandi aldurs.

Lögmenn Sanderson leiddu fram fjölda sérfræðinga sem báru vitni um það að tjón hans hefði aðeins geta skýrst af því að Paltrow hefði lent aftan á honum og því væri ljóst að hún bæri ábyrgð á slysinu og tjóninu sem það olli.

Ekki gekk þetta þó upp hjá lækninum en kviðdómur féllst á gagnkröfur Paltrow og gerðu lækninum að greiða henni 1 dollara í bætur.

Sýnt var í beinni útsendingu frá málsmeðferðinni og mátti þar sjá hvar Gwyneth hallaði sér að lækninum eftir að niðurstaðan var lesin up og hvíslaði eitthvað að honum áður en hún yfirgaf dómsalinn.

Sanderson afhjúpaði sjálfur við fjölmiðla hvað hún sagði, sem var:„Ég óska þér velfarnaðar“ og svaraði Sanderson því – „Þakka þér elskan“

Sanderson sagði við fjölmiðla að þessi orð hafi hlýjað honum um hjartarætur og sagðist hann trúa því að hún væri einlæg í sínum málflutningi. Sanderson tók þó fram að hann hefði engu röngu haldið fram í málinu.

Paltrow hefur gefið frá sér yfirlýsingu vegna málsins þar sem hún sagði að hún hafi litið svo á að málflutningur Sanderson hafi vegið að heilindum hennar og sé hún ánægð með niðurstöðuna og þakkaði dómara og kviðdómi fyrir þeirra störf.