„Svona er ég mótaður og svona er ég bara. Það er ekkert að því. Þú getur verið með tilgátur um að það sé hægt að laga mig með laser eða heilaskurðaðgerð. En ég er svona. Samfélagið bjó mig til, ég á rétt á því að vera svona og þetta er í lagi,“ segir Birgir Þórarinsson tónlistarmaður og meðlimur GusGus, eða Biggi veira eins og hann er betur þekktur.
Biggi er í viðtali í nýjasta þætti hlaðvarpsins Karlmennskan og þar ræðir hann meðal annars klæðaburð sinn, en Biggi vekur oft athygli fyrir að klæða sig á óhefðbundinn hátt miðað við karlmann og er hann oftast í hefðbundnum kvenmannsfatnaði.
Biggi segir frá því að hann hafi falið hneigð sína til kvenfatnaðar, en þegar hann kynntist konunni sinni árið 1998 kom hann út fyrir henni.
„Fram að því hafði ég hulið þetta frá kærustunum mínum. Ég var inni í skápnum með þetta. Þetta var ekkert í lagi. Í næntísinu var þetta bara frekar frumstætt,“ segir Biggi og segir konu sína aldrei hafa gert athugasemdir út í kyntjáningu hans. Hann hafi heldur aldrei lent í vandræðum, fata- og förðunarval hans sé hluti af honum og fólk taki því almennt vel.
„Kannski kemst ég frekar upp með að vera svona af því að ég er tónlistarmaður.“
Hægt er að hlusta á viðtalið við Bigga í heild sinni hér fyrir neðan.