Greta Salóme tónlistarkona og Elvar Þór Karlsson viðskiptafræðingur keyptu fokhelt einbýlishús í Mosfellsbæ í mars 2021, hönnuðu það sjálf og fluttu inn í nóvember sama ár. Sonurinn Bjartur Elí fæddist síðan í desember 2022. 

„Við höfum alltaf haft mikinn áhuga á að búa okkur fallegt heimili sem væri griðastaður bæði fyrir okkur og alla sem koma inn á okkar heimili. Við ætluðum að fá innanhússhönnuð í að hanna þetta með okkur en svo komumst við að niðurstöðu um að gera þetta sjálf. Við höfum bæði brennandi áhuga á hönnun og höfðum mjög sterkar skoðanir á hvernig við vildum hafa þetta,“ segir Greta Salóme. Innlit var á heimili fjölskyldunnar í þættinum Matur og heimili sem sýndur er á Hringbraut alla þriðjudaga.

Segir Greta Salóme þau hafa verið búin að leita lengi að einbýli en þau hafi vitað strax þegar þau gengu inn í húsið að það yrði framtíðarheimilið þeirra þótt það hefði verið bara timbur og steypa þá.

„Myndi segja að stíllinn sé mínímalískur en samt hlýr og örugglega skandinavískur en samt rómantískur. Það skiptir mig öllu máli að allir finni sig velkomna á mínu heimili. Hjarta heimilisins slær algjörlega í eldhúsinu og stofunni. Húsið skiptist í þrjá hluta, svefnherbergisálmu, bílskúr og svo alrými með eldhúsi og stofu og þar slær hjartað. Þar kveikjum við upp í arninum, eldum mat fyrir okkur og okkar og þar söfnum við minningum með fólkinu okkar,“ segir Greta Salóme.

Í húsinu er mikið af mjúkum jarðlitum og gylltum tónum í bland við dökkar innréttingar og ljósan stein. „Við ákváðum strax að velja gæði í öllu sem á að standa lengi þótt það væri dýrara þar sem við höfum brennt okkur á því áður að fara styttri leið í þannig hlutum og það hefur alltaf komið í bakið á okkur.“

Svefnherbergið er með dökkum litum. „Við vildum skapa smá svona hótelherbergisstemningu í svefnherberginu og hugsa sérstaklega út í allt sem getur stuðlað að betri svefni og vellíðan. Við völdum að hafa herbergið dökkt og þannig að það tæki utan um mann. Við settum teppi á gólfið sem er sennilega besta ákvörðun sem við tókum í öllu ferlinu. Svo erum við með þykk myrkvunartjöld og dökkan lit á veggjum og lofti. Mér finnst ekki gaman að sofa og sef mjög laust en mér finnst svefninn hafa batnað til muna eftir að við fluttum inn.“

Stúdíó er á heimilinu og æfingaaðstaða í bílskúrnum. „Við tókum strax ákvörðun um að hanna húsið eftir því hvernig við lifum og í samræmi við okkar lífsstíl. Bílskúrinn eru 40 fermetrar og við vildum ekki nota hann undir bílageymslu heldur breyta honum í æfingaaðstöðu. Við æfum bæði mikið og þetta er búinn að vera mikill tímasparnaður og sérstaklega núna þegar við erum komin með lítið barn.“