Tónlistarmaðurinn Mugison óskaði eftir aðstoð Íslendinga fyrr í dag við textaskrif fyrir nýjasta lag sit, É dúdda mía.
„Var búinn að safna svona skemmtilegum og skrítnum íslenskum frösum í eitt skjal í tölvunni til að nota í laginu – en skjalið ákvað að eyða sér! Nú man ég bara É dúdda mía, Hviss Bamm Búmm, Obbossí – dettur þér eitthvað svipað í hug? Ekki verra ef maður getur sagt það á innsoginu,“ segir Mugison í færslu á Facebook.
299 svör hafa verið skrifuð undir færsluna þegar þetta er skrifað og virðist nóg til af skemmtilegum frösum á íslenskri tungu.
Helduru að það sé, aaalveeeeg, segðu, ligga ligga lái, jamm og jæja, seisei já og je minn eini, spinnigal, jahéddnahér og get svo svaaaarið það eru á meðal frasa sem stungið er upp á.