Íslandi er nú spáð 21. sæti í Eurovision í vor. Við höfum klifrað hægt og rólega upp veðbankana en áður en Diljá Pétursdóttir var valin fulltrúi Íslands vorum við í 28. sæti. Síðan þá hefur Ísland þokast hægt upp og í dag er okkur spáð 21. sæti.
Lag Diljár, Power, hefur hlotið mikið lof erlendra Eurovision-sérfræðinga og megum við líklegast búast við að sjá það hækka enn frekar í veðbönkum.
Diljá keppir fyrir hönd Íslands í seinni undankeppninni, þann 11. maí næstkomandi í Liverpool í Bretlandi. Alls taka sextán þjóðir þátt og komast tíu áfram og keppa á úrslitakvöldinu, þann 13. maí næstkomandi.
Af þeim fimmtán þjóðum sem Ísland keppir á móti er aðeins fjórum þjóðum spáð betra gengi en okkur; Ástralíu, Austurríki, Armeníu og Georgíu. Ísland hefur tekið fram úr Eistlandi og Póllandi í veðbönkum undanfarna viku.
