Tónlistarkonan Dagbjört Rúriksdóttir, eða DÍA eins og hún er kölluð, varar fólk við óprúttnum aðila sem er að nota myndir af henni til að blekkja fólk og spila á tilfinningar fólks. Hún segir að ef einhver er að tala við „hana“ á stefnumótaforriti þá er það ekki hún.
„Það var stelpa sem hafði samband við mig í gær sem sá svo kölluðu Chloé á stefnumótasíðu,“ segir Dagbjört í samtali við DV.
„Þetta var ekki fyrsta manneskjan sem hefur haft samband við mig og bendir mér á að einhver sé að nota mínar myndir eða þykjast vera ég. Það hafa verið gerðir gerviprófílar á Instagram þar sem einhver þykist vera ég og ég hef einnig fengið ábendingar um aðra aðganga á Tinder. Svo var líka eitthvað verið að tala um OnlyFans, en á þessum gerviprófíl stóð að ég væri með OnlyFans-síðu. Sem er náttúrulega bara bull, ég hef aldrei verið með OnlyFans,“ segir hún.
Dagbjört ítrekar að hún sé ekki manneskjan sem fólk er að tala við á Tinder.
„Ég er með aðgang á Tinder en hef hvorki notað hann lengi né verið með forritið í símanum,“ segir hún.
„Manneskjan sem hafði samband við mig hafði verið alvarlega blekkt um langt skeið, ásamt öðru fólki, og það er ekki fallega gert.“
„Ef einhver sem stundar þetta er að lesa þetta, þá vil ég bara segja að þetta er alls ekki svalt. Þetta gæti gefið þér tímabundna spennu og æsing og falska sjálfsöryggistilfinningu. En þú munt enda með að vera ennþá meira einmana en áður. Vertu frekar þú sjálf/ur og náðu alvöru tengingu við aðra manneskju.“