Fyrrverandi veitingamaðurinn og málarinn Jóhannes Felixson, þekktur sem Jói Fel, sætir nú harðri gagnrýni og er sakaður um að reyna að græða á hörmungum annarra.
Í gær greindi Jói frá því að hann væri að selja málverk eftir sig af Grindavíkurbæ og myndi helmingur söluverðsins renna til Björgunarsveitarinnar Þorbjarnar. Tók hann sérstaklega fram að myndin væri ekki föl fyrir minna en hundrað þúsund krónur.
Sjá einnig: Jói Fel málaði mynd af Grindavík – Hluti söluverðs rennur til Þorbjarnar
Óhætt er að fullyrða að netverjar hafi skipst í fylkingar vegna framtaksins. „Takk fyrir það, fallega gert,“ sagði einn við Facebook-færslu fréttar DV um málið og „vel gert Jói,“ sagði annar.
En mun fleiri voru á því máli að fyrrum bakarinn væri að reyna að græða á hörmungum Grindvíkinga.
„Gefðu allt eða ekkert!“ sagði einn.
„Svo gjafmildur. Hluti söluverðs, það er ekkert annað,“ sagði annar með hláturstjákni og hafa yfir þrjátíu manns líkað við þá athugasemd.
Fleiri tóku í sama streng.
„Var að fara að segja þetta! Hluti… í alvöru? Hann á pening og getur alveg gefið allan hlutann.“
„Ég get nú ekki orða bundist. Mér finnst verulega hallærislegt að hann ætli að gefa hluta söluverðs. Annað hvort ertu höfðingi í þér eða ekki. Og þetta er á engan hátt höfðingjalegt.“
„Auðvitað ætlar hann sér að græða á hörmungum annarra!“
