Bandaríska blaðakonan Talia Lakritz er mikill aðdáandi Íslands og skrifar reglulega um landið í Business Insider sem DV hefur reglulega fjallað um. Í gær birtist pistill eftir Lakritz þar sem hún fer yfir átta leiðir fyrir ferðamenn til að spara peninga á Íslandi en hugljómunin hafi komið þegar hún borgaði fyrir rándýra avókadó-brauðsneið í Bláa Lóninu. Það hafi verið fyrsta daginn hennar í einni Íslandsheimsókninni og hún séð fram á það að veskið og sparifé hennar yrði fyrir verulegum skakkaföllum ef ekki yrði gripið til aðgerða.
Fyrsta sparnaðaráð hennar til Bandaríkjamanna var að kaupa næturflug hjá til að mynda Icelandair þar sem lagt væri af stað seinnipartinn og komið til Íslands eldsnemma að morgni. Þau væru ódýrari en flug á kristilegri tímum. Segir Lakritz hafa sparað sér 100 dollara, rúmlega 14 þúsund krónur með því að kaupa slíkt flug.
Lakritz vill meina að hún hafi sparað sé væna summu með því að bóka bílaleigubíl hjá fyrirtæki sem ekki var með aðstöðu í Leifstöð frekar en hjá risunum Avis, Budget, Europcar og Hertz. . Það hafi eðli málsins samkvæmt verið aðeins meira vesen en hún hafi leigt bíl hjá Economy Rent a Car og borgað tæplega 50 þúsund krónur fyrir fimm daga. Verðið hafi verið tugþúsundum króna hærra hjá risunum.
Lakritz ráðleggur ferðalöngum að koma með mat frá heimalandi sínu og þá sérstaklega allskonar nasl á ferðalagið, hnetur og ýmis orkustykki. Slíkur munaður kosti mikið á Íslandi.
Þá mælti blaðakonan með því að ferðalangar keyptu sér mat eins og Íslendingar í íslenskum stórmörkuðum. Verðið væri hærra þar en á mat í Bandaríkjunum en samt margfalt ódýrara en á íslenskum veitingastöðum.
Lakritz segist hafa sparað rúmlega 20 þúsund krónur með því að bóka ódýr hótel þar sem morgunmatur var innifalinn í verðinu. Morgunverðarhlaðborðin íslensku séu ágæt og það hefði verið dýrara að kaupa sér morgunmat annarsstaðar.
Þá benti Lakritz á hina klassísku ráðleggingu að kranavatnið á Íslandi væri afbragð en að auki sagðist hún hafa margsinnis fyllt á brúsann sinn í hreinum lækjum og sprænum í íslenskri náttúru.
Blaðakonan mælti með því að ferðamenn fái ráðleggingar frá heimamönnu um hagstæða veitingastaði og upplifanir. Þannig segist hún hafa heyrt af Secret Lagoon / Gömlu Lauginni á Flúðum sem hafi verið margfalt ódýrari en Bláa Lónið og Sky Lagoon og hún kunnað betur að meta. Þá hafi Íslendingur mælt með Flórunni Bistro í Grasagarðinum og þar hafi hún fengið frábæra máltíð á hagstæðu verði.
Þá benti Lakritz á að ókeypis er að njóta fjölmargra íslenskra ferðamannaperla og nefndi í því samhengi Seljalandsfoss. Mælti hún með því að fólk sparaði sér aurinn með því að heimsækja frekar slíka staði en þá sem að rukka til dæmis gjald fyrir bílastæði og aðgang.
