Leikarinn Jeremy Renner slasaðist alvarlega skömmu eftir áramótin eftir að hann varð undir snjóbíl. Eftir þrotlausa vinnu lækna tókst að bjarga lífi hans og við tók erfið endurhæfing enda hafði leikarinn hlotið gífurlega áverka á brjóstholi og fótum.
Nú hefur hann deilt myndbandi þar sem hann sést hlaupa upp heimreiðina heima hjá sér, á móti halla. Leikarinn skrifað á Instagram:
„Í dag hef ég verið 10 mánuði í endurhæfingu. Þetta var fyrsta tilraunin mín til að hlaupa svona uppí móti og ég grét gleðitárum, fann fyrir von og þakklæti fyrir allan stuðninginn sem ég hef fengið frá aðdáendum sem og fjölskyldu og vinum. Ég held áfram að ýta mér út fyrir þægindarammann, en þið eruð eldsneytið sem keyrir mig áfram.“
Jeremy greindi frá því fyrr í þessum mánuði að hann hafi reynt allar tegundir endurhæfingar undanfarna mánuði, þar með talið óteljandi klukkustundir hjá sjúkraþjálfara, sprautur með allskonar efnum sem eiga að hjálpa, vítamín æðaleggi, stofnfrumur, innrautt ljós, þrýstiklefar og svona mætti lengi áfram telja.
„En besta meðferðin hefur verið hugarfarið, að hafa viljastyrk og geta unnið að því að ná mér og verða betri. Vera framúrskarandi. Mér finnst það vera skylda mín að gera svo. Að sóa ekki þessu öðru tækifæri sem ég fékk í lífinu, og geta gefið til baka til fjölskyldu, vina og til allra sem hafa valdeflt mig til að þrauka. Ég þakka ykkur öllum.“
View this post on Instagram
