Danska konungsfjölskyldan hefur verið í hringiðu skandals eftir að Friðrik krónprins rataði í heimsfréttirnar fyrir stefnumót hans með mexíkósku leikkonunni Genoveva Casanova.

Friðrik er erfingi dönsku krúnunnar. Hann hefur verið giftur hinni áströlsku Mary Donaldson í næstum tvo áratugi og eiga þau saman fjögur börn.

Spænska tímaritið Lecturas birti myndir af Friðrik og Casanova á rölti um Madríd og hélt því fram að þau hafi varið nóttinni saman.

Leikkonan neitaði öllum ásökunum um framhjáhald í samtali við Hola! og sagði þetta vera út í hött. Hún sagðist einnig vera að íhuga að lögsækja blaðið vegna málsins.

Nú hefur danska konungshöllin loksins rofið þögnina um málið. Talsmaður hallarinnar sagði við danska fjölmiðilinn B.T. að þau neiti að tjá sig um kjaftasögur af þessu tagi.

Hvorki Friðrik né eiginkona hans, Mary prinsessa, hafa gefið út yfirlýsingu vegna málsins.

Málið hefur vakið gríðarlega athygli en fyrir ótrúlega tilviljun voru spænsku konungshjónin, Don Felipe og Doña Letizia, einmitt í heimsókn í Danmörku þegar Lecturas birti fyrstu fréttirnar um málið. Friðrik og Mary tóku á móti þeim við hátíðlega athöfn í Kaupmannahöfn á miðvikudaginn síðastliðinn.

Að sögn Lecturas hafði fólk á vegum Letizia samband við miðillinn til að athuga hvort að sagan reyndist sönn. Spænska tímaritið heldur því fram að Felipe Spánarkonungur og Letizia Spánardrottning vilji halda sig langt í burtu frá skandalnum sem þegar hefur varpað skugga á heimsókn þeirra til Danmerkur.

Sjá einnig: Skandall skekur dönsku konungsfjölskylduna – Krónprinsinn sakaður um framhjáhald með mexíkóskri leikkonu