Pamela skaust upp á stjörnuhimininn þegar hún fór með hlutverk Casey Jean Parker í geysivinsælu þáttunum Strandverðir eða Baywatch.
Tískuvikan í París hefur staðið yfir undanfarna viku og hefur útlit Pamelu verið eitt af því sem hefur vakið hvað mesta athygli, en hún ákvað að synda gegn straumnum og nota engan farða eða snyrtivörur á andlitið.
Leikkonan Jamie Lee Curtis er ein af mörgum sem hefur tekið fersku útliti Pamelu fagnandi. „Náttúrufegurðarbyltingin er formlega hafin!“ skrifaði hún með mynd af fyrrverandi Baywatch-stjörnunni á Instagram.
„Pamela Anderson mætti svona á tískuvikuna þar sem er svo mikil pressa og miklar væntingar, og þessi kona mætti og tók sitt pláss með ekkert á andlitinu. Mér finnst þetta svo magnað og ég dáist að hugrekki hennar og uppreisnaranda.“
Í viðtali við Elle í síðasta mánuði sagði Pamela að það væri „frelsandi, skemmtilegt og smá uppreisn í senn“ að vera ómáluð.
Hún útskýrði að hugmynd hennar um fegurð hafi breyst með aldrinum.
„Ég held við verðum öll frekar fyndin í útliti með aldrinum. Ég hlæ stundum að mér sjálfri í speglinum. Ég hugsa: „Vá, er þetta í alvöru að gerast fyrir mig?“ Þetta er ferðalag. En mér líður vel, ég er á góðum stað.“
Sjá einnig: Hæðir og lægðir Pamelu Anderson
