Segir áhrifavaldurinn Erna Kristín Stefánsdóttir, kölluð Ernuland, í pistli á Facebook.
Erna er með yfir 26 þúsund fylgjendur á Instagram en síðan er eina tekjulind fjölskyldunnar í nýju landi, þau fluttu fyrir stuttu til Danmerkur.
„Líf mitt er eins og léleg bíómynd og ykkur er boðið. Núna þarf ég að borga hakkara ákveðna upphæð svo Instagram reikningnum mínum verði ekki eytt. Eina tekjulind fjölskyldunnar í nýju landi. Það er íslenskur einstaklingur sem greiðir þessum svokallaða hakkara upphæð til þess að síðan mín verði tekin niður, sem flokkast auðvitað undir fjárkúgun í ljósi þess að vettvangurinn er vinnan mín. Viðkomandi er búinn að gera það einu sinni og er núna að gera það í annað sinn. Pistillinn fyrir neðan þennan útskýrir síðan lygilega byrjun þessa pistils. Enda eins og ég segi þá er þetta líkast lélegri bíómynd,“ segir Erna og er þá að vísa í aðra færslu þar sem hún greinir frá hrottalegu einelti sem átta ára drengur hennar hefur þurft að þola, þar sem gerendur eru bæði börn og fullorðnir.
„Ég óska þess að þessi manneskja finni frið í hjarta sínu og fari að einbeita sér að einhverju öðru en mér og minni velferð. Lögreglan er í málinu en ég hika ekki við að nafngreina viðkomandi ef síðunni verður lokað. Viðkomandi er að fylgjast með og getur alltaf borgað hakkaranum til baka ef hann vill ekki að nafnið sitt og sitt fyrirtæki fari upp á yfirborði. Þeir sem þekkja mig vita að ég er kannski algjör dúlla og hef lítið gaman af drama. En þau vita líka að ég er með bein í nefinu og læt ekki vaða yfir mig. Og þá síst miðaldra karlmenn með minnimáttarkennd.“
Instagram-síðu Ernu var fyrst lokað í ágúst en hún fékk síðuna aftur eftir nokkra daga.
Sjá einnig: Erna Kristín með gleðifréttir eftir mjög erfiða daga – „Ég var búin að missa alla von“
