„Fimm árum seinna greindist ég aftur með sama mein á sama stað,“ segir Arndís Thorarensen sem hefur tvisvar greinst með brjóstakrabbamein, í fyrra skiptið var hún 39 ára og segist hún hafa upplifað sig í kjölfarið sem öðruvísi þjóðfélagsþegn sem væri minna virði. 

Hún var rétt byrjuð að jafna sig og fannst lífið vera komið á góðan stað þegar hún varð fyrir því áfalli að greinast aftur. Eftir seinni greininguna þurfti Arndís á fleiri meðferðum að halda, en í dag tveimur árum seinna upplifir hún að hún sé að endurheimta fyrri orku aftur. 

„Þetta er dálítið nýtt líf, það snýst allt svolítið svona við og svo lærir maður á nýja lífið.“

Arndís vill ráðleggja þeim sem eru að greinast eða byrja í svona ferli að viðurkenna fyrir sjálfum sér að þetta er erfitt og þiggja hjálp, því það sé mikið af góðri hjálp í boði.

„Þó að maður ætli að vera jákvæður og bjartsýnn og sterkur þá er þetta sorgarferli sem maður þarf að fara í gegnum. En það mun lagast og sérstaklega ef maður fær góða hjálp.“

Arndís segir Bleiku slaufuna vera tækifæri fyrir alla að leggjast á eitt að gefa til baka, ekki síst til krabbameinsrannsókna til að auka líkur á lækningu. Hún undirstrikar einnig mikilvægi þess hvað það getur haft góð áhrif á erfiðu dögunum að fá kveðju eða skilaboð um að einhver sé að hugsa til manns og segir það geta skipt mjög miklu máli.