Ekkert er íslenskara og betra en kótilettur í raspi og það er sannkallaður afmælismatur. Samhjálp er 50 ára í ár og árlegt Kótilettukvöld samtakanna ber keim af þeim tímamótum. Að þessu sinni verður það haldið á Hilton Reykjavík Nordica fimmtudaginn 19. október og nýstárlegar og spennandi uppákomur setja svip á kvöldið.
Í fyrra gafst gestum á Kótilettukvöldinu tækifæri til að bjóða í margvíslega eigulega muni og hagnýta þjónustu á Þöglu uppboði. Það tókst einstaklega vel og í ár verður enn meira og áhugaverðara úrval að finna á uppboðsborðinu í forsalnum. Fallegar hönnunarvörur, listaverk eftir Jóhannes Geir, Línu Rut, Ragnheiði Jónsdóttur og Sigrúnu Eldjárn. Postulínssafngripir frá frægum verksmiðjum, íslenskt skart meðal annars frá Vera Design og ótalmargir eigulegir munir.
Í forsalnum verður einnig Pop Up Boutique með vönduðum tískufatnaði. Vandaðar ullarvörur, sjöl, slæður, fylgihlutir, fatnaður og fleira sem gleður augu og hjarta tískumeðvitaðra. Hönnuðir á borð við STEiNUNNI, Freebird, Sif Benedicta og Andrea by Andrea verða í boði ásamt ótalmörgum öðrum fallegum flíkum. Auk þess ætla söng- og leikkonurnar Salka Sól og Katrín Halldóra að teygja sig inn í fataskápa sína og gefa fatnað sem nýst gæti öðrum á sviði eða utan sviðs. Hér er tækifæri til að skapa sinn eigin sérstæða stíl. Á Facebook-síðu Samhjálpar má sjá hluta af varningnum í Pop Up Boutique.
En fastagestir Kótilettukvöldsins bíða alltaf spenntastir eftir að fá kótilettur og meðlæti. Aftur leggja matreiðslumeistarar úr kokkalandsliðinu okkur lið og matreiða kótilettur af sinni einskæru snilld. Tónlistin hefur ávallt skipað stóran sess á Kótilettukvöldi og í ár kemur landsþekkt tónlistarfólk fram og tekur góðkunn lög þar á meðal eru: Gréta Salóme, Páll Rósinkrans, Hrönn Svansdóttir og Óskar Einarsson. Veislustjóri verður Þóra Karítas Árnadóttir.
Miðinn á kótilettukvöldið gildir einnig sem happdrættismiði og verða ýmsir glæsilegir vinningar í boði, frábærar upplifanir, notalegar snyrtivörur og fleira sem gleður og gagnast.
Bakhjarlar
Kótilettukvöldið er mikilvægur hlekkur í fjáröflun fyrir Kaffistofu Samhjálpar. Bakhjarlar Kótilettukvöldsins í ár eru: Einhamar Seafood ehf., Marel Iceland ehf., Guðmundur Arason ehf. og Inter ehf.
Allur ágóði af Kótilettukvöldinu rennur til víðtækrar starfsemi Samhjálpar þar sem uppbygging er á öllum stöðum. Endilega takið frá fimmtudagskvöldið 19. október og tryggið ykkur miða sem allra fyrst þar sem sætaframboð er takmarkað. Miðasala fer fram á Tix.is og miðaverð er kr. 9900.
