Nýjasta myndband Youtube-stjörnunnar MrBeast hefur vakið talsverða athygli en í því keppa fulltrúar 200 landa heims í nokkrum íþróttagreinum sem eru hverri annarri mikilfenglegri. Keppt er í endurbættum útgáfum af Ólympíugreinum eins og grindahlaupi, fimleikum, bogfimi, fótbolta og skylmingum þar til einn keppandi stendur uppi sem sigurvegari nælir sér í hvorki meira né minna en 250 þúsund bandaríkja dali eða rúmlega 33 milljónir króna.
MrBeast er ein vinsælasta samfélagsmiðlastjarna heims og hefur vakið heimsathygli fyrir afar metnaðarfull myndbönd þar sem þátttakendur eiga möguleika á að vinna sér inn stórfé. Þá er hann orðinn stórtækur í hverskonar viðskiptum og hefur opnað skyndabitakeðjur sem bera nafn hans auk þess að framleiða allt að því óætt súkkulaði sem fæst nú hérlendis og bugaðir íslenskir foreldrar hafa neyðst til þess að kaupa fyrir organdi skjáhorfandi börn sín.
Ísland á að sjálfsögðu sinn fulltrúa í keppninni þó að viðkomandi, sem DV þekkir ekki frekari deili á, komi ekki mikið við sögu í myndbandinu.
Fyrsta greinin er grindahlaup þar sem keppendurnir 200 hafa 30 sekúndur til að komast yfir keppnisbrautina áður en hliðið við endamarkið hreinlega lokast. Rúmlega helmingur keppenda, alls 103, ná ekki að komast yfir brautina á þeim tíma en fulltrúi Íslands er þó í hópi þeirra 97 sem komst áfram í næstu umferð.
Þá er keppt í fimleikum en sú keppnisgrein snýst um að tíu manna hópar keppast um að komast yfir einskonar jafnvægisslár og eru þeir fimm fyrstu sem komast yfir komnir áfram í næstu umferð en hinir fimm detta úr leik. Í þeirri keppnisgrein bregður fulltrúa Íslands fyrst fyrir í örskotsstund en stuttu síðar má sjá á yfirliti keppninnar að fulltrúi Íslands er dottin úr leik.
Eins og áður segir er því næst haldið í fleiri íþróttagreinar, sem eru með tilkomumiklum útfærslum eins og MrBeast er einum lagið, allt þar til einn sigurvegari stendur eftir.
Myndbandið, eins og flest þau sem MrBeast kemur nálægt, hefur slegið í gegn og hefur fengið um 86 milljón áhorfa á nokkrum dögum og er hið vinsælasta á Youtube í dag.
