Bandaríska söngkonan og þáttastjórnandinn Kelly Clarkson hefur viðurkennt að nota líkamlega refsingu af og til þegar hún agar börn sín. Málefnið er eldfimt, en Clarkson segist eiga til að rassskella börn sín, dótturina River Rose, sem fædd er 2014 og soninn, Remington Alexander, sem er fæddur 2016.

„Ég er alveg fyrir að nota rasskellingar, sem sumir eru alfarið á móti. Ég er ekki að tala um að lemja börnin mín, ég er að tala um léttan rassskell,“ sagði Clarkson í viðtali. Segir hún að foreldrar hennar hafi rassskellt hana í æsku og hún sjái því ekkert því til fyrirstöðu að nota sömu uppeldisaðferð á sín börn.

Hún tók einnig fram að það geti verið erfitt að aga börn sín í fjölmenni þar sem aðrir deili ekki endilega sömu skoðunum og hún með að hirta börnin líkamlega ef og þegar þau eru óþekk. Hún segir þó vara börnin við áður en kemur að líkamlegri refsingu. „Ég segi sem dæmi: „Ég rassskelli þig ef þú hættir ekki strax, þetta er fáránlegt. “  Og í alvöru talað. Þetta virkar, dóttir mín er minna óþekk en áður,“ segir Clarkson sem hefur ætíð verið opinská með móðurhlutverkið, mömmusamviskubitið og pressuna sem foreldrar eru undir.