Parið Greta Salóme, tónlistarkona, og Elvar Þór Karlsson, verkefnastjóri fyrirtækjaráðgjafar Íslandsbanka, eru búin að ákveða giftingardaginn, 29. apríl næstkomandi.
Elvar Þór bað sinnar heittelskuðu 6. janúar 2018, þegar parið var statt í Taílandi í bootcamp/fitness-æfingabúðum.
Parið hefur verið önnum kafið síðan. Þau byggðu sér hús í Mosfellsbæ árið 2021 og eignuðust soninn, Bjart Elí, 24. Nóvember í fyrra. Sonurinn kom í heiminn fimm vikum fyrir settan dag og sagði Greta Salóme í viðtali við Fréttablaðið að hún hefði fengið nýtt hlutverk fyrir jólin, besta hlutverk sem hún getur hugsað sér. Stærsta jólagjöfin er sonurinn, nýfædda jólabarnið.
Greta Salóme ætlaði að taka því rólega á aðventunni og undirbúa komu jólabarnsins þegar sonurinn mætti í heiminn nánast fyrirvaralaust. „Þessi tilfinning, að fá son okkar í fangið, er ólýsanleg. Ef ég á að draga það saman þá er það eins og lífinu sé snúið á hvolf á einni sekúndu og lífið fái nýjan tilgang. Maður skilur ekki neitt en um leið skilur maður allt einhvern veginn.“
Og nú er brúðkaupsdagurinn framundan í lok apríl.