Það hefur enginn skortur verið á konunglegu drama undanfarin misseri og tengist það yfirleitt hertogahjónunum, Harry Bretaprins og Meghan Markle.

Nýjasta málið varðar heimili hjónanna í Bretlandi, Frogmore Cottage, sem þau fengu úthlutað til sín þegar þau voru enn starfandi meðlimir konungsfjölskyldunnar. Frogmore Cottage er skammt frá Windsor kastalanum og eftir að Meghan og Harry fluttu til Bandaríkjanna hafa þau notað Frogmore þegar þau hafa dvalið á Bretlandi, enda hafa þau þar aðgengi að betri öryggisgæslu en ella.

Gagnrýnt var árið 2019 þegar hjónin réðust í umfangsmiklar og rándýrar endurbætur á heimilinu áður en þau fluttu inn, en peningarnir komu úr vasa skattgreiðenda. Hjónin endurgreiddu þó úr eigin vasa árið 2020 og róaðist almenningur í Bretlandi nokkuð við það.

Nú er þó svo komið að hjónunum hefur verið úthýst af föður Harry, Karli Bretlandskonungi. Hann hefur ákveðið að vísa hertogahjónunum úr Frogmore og var sú ákvörðun tekin um það leyti sem ævisaga Harry, Spare, kom út.

Mun Karl hafa boðið Frogmore til bróður síns, Andrésar Bretaprins, sem hefur fallið í ónáð eftir að hann var sakaður um kynferðisbrot á ólögráða stúlku. Frogmore er töluvert minna húsnæði en núverandi heimili Andrésar – Royal Lodge og nú styttist í að árlegum greiðslum úr hirslum konungsfjölskyldunnar til Andrésar verði hætt og hefur hann því ekki efni á að búa í stærra húsnæðinu.

Harry og Meghan munu þurfa að rýma Frogmore fyrir sumarið.

Talið er að þessi úthýsing sé merki um sögulega stirð samskipti milli konungsins og hertogahjónanna. Erfitt er annað en að velta því fyrir sér hvort verið sé að refsa Harry fyrir ævisöguna, en samkvæmt ónefnum heimildarmönnum breskra miðla er konungurinn ævareiður yfir bókinni.

Talsmenn hertogahjónanna hafa staðfest við Page Six að konungurinn hafi sent þeim tilkynningu um útburð.