„Þetta er svona með því steiktasta sem ég hef gert í vinnunni,“ segir húðflúrarinn Ólafur Laufdal um afar óvenjulegt húðflúr sem hann gerði í gær. „Alveg klárlega.“
Húðflúrið sem um ræðir er mynd af Valla, sem er hvað þekktastur sem aðalpersónan í Hvar er Valli? bókaflokknum, en húðflúrið er staðsett á spönginni svokölluðu, það er á svæðinu á milli kynfæra og endaþarms. „Þetta er nú góður vinur minn sko, ég færi eflaust ekki að gera þetta nema það væri þannig. En þetta var búin að vera hugmynd hjá honum í mörg ár, ákváðum að láta vaða á þetta núna,“ segir Ólafur í samtali við blaðamann.
Aðspurður segist Ólafur, sem vinnur á húðflúrstofunni Lifandi list, aldrei hafa gert neitt húðflúr í líkingu við þetta. „Nei, ekki einu sinni nálægt þessu.“
Ólafur birti myndir af húðflúrinu á Instagram-síðu sinni í gær og fékk það mikil og góð viðbrögð frá fylgjendum hans. „Það eru mjög margir búnir að vera bregðast við þessu á Instagram-inu mínu,“ segir Ólafur.
„Fólk var bara ekkert endilega að trúa því fyrst að ég væri raunverulega að fara að gera þetta. Fólk var bara að hrósa honum líka, aðrir flúrarar voru líka að senda á mann að þetta væri það besta sem þeir hefðu séð. Þannig þetta hafa verið mjög góð viðbrögð, fólk styður hann í þessari ákvörðun.“