Á morgun, laugardaginn 6. ágúst, ná Hinsegin dagar hámarki með Gleðigöngunni sem tekur yfir miðborg Reykjavíkur.
Gangan fer af stað klukkan 14 frá Hallgrímskirkju og sem leið liggur niður Bankastræti, Lækjargötu og Fríkirkjuveg að Hljómskálagarði þar sem fram fer hátíðardagskrá. Reykjavíkurborg hvetur fólk til að koma gangandi, hjólandi eða með strætó í bæinn því miklar takmarkanir verða á umferð.
Í tilkynningu Reykjavíkurborgar um viðburðinn segir meðal annars:
„Gleðigangan er hápunktur Hinsegin daga en hún eykur sýnileika hinsegin fólks og er stuðningur við réttindabaráttu þess. Í göngunni sameinast hinsegin fólk undir einum hatti og gengur í gleði fyrir málefni hinsegin baráttunnar ásamt fjölskyldu og vinum. Í ár er lögð sérstök áhersla á að minna á réttindabaráttu hinsegin fólks en víða hefur verið bakslag í réttindum þess og meira hefur borið á fordómum og hatri í garð hinsegin fólks en áður.“
Allmargar götur verða lokaðar í miðborginni á meðan göngunni stendur. Lokanir eru frá Hallgrímskirkju og á öllum aðliggjandi götum göngunnar, Skólavörðustíg, Bankastræti, Lækjargötu, Fríkirkjuveg og Sóleyjargötu.
