Listamaðurinn Ellý Ármanns er gestur í endurreistu hlaðvarpi Sölva Tryggvasonar. Í viðtalinu kemur meðal annars fram að Ellý og sonur hennar hafa ekki talast við í fjögur ár eftir að Ellý rak hann að heiman.
Mbl.is rekur efni viðtalsins. Þar er haft eftir Ellý:
„Nú fer ég að hugsa um hin son minn sem talar ekki við mig. Hann lokaði á mig og ég er ekki búin að heyra í honum í fjögur ár. Ég rak hann að heiman. Ég var ekki góðu jafnvægi sjálf á þessum tíma og hann fór út af réttri braut og ég rak barnið mitt í burtu að heiman af því að hann var að gera hluti sem hann átti ekki að gera. Mig langar mjög mikið að heyra í honum og ég reyni reglulega að senda honum skilaboð eða ná til hans, en hann vill ekki tala við mig. En þarna verð ég að vera í trausti. Ég get farið undir sæng og grátið, en hann býr hjá pabba sínum og ég verð bara að treysta því að allt sé eins og það á að vera. Ég sé auðvitað eftir þessu og ég elska barnið mitt af öllu hjarta. Ég veit að hann er að læra, en hann er reiður. Ég verð að líta á þetta sem lærdóm og treysti því að við munum ná saman. En ég stýri því ekki hvort það gerist eftir viku eða 10 ár. En ég vona að hann viti af mér og að ég vilji ekkert meira en að við munum aftur eiga heilbrigð og góð samskipti.”
Ellý rekur ýmsa aðra erfiðleika í viðtalinu, meðal annars gjaldþrot hennar og stormasamt starfstímabil á Vísir.is, en þá var stofnuð Facebook-síða til höfuðs henni þar sem skorað var á Vísi að reka hana.
Ellý segist þakka fyrir þá erfiðleika sem hún hefur gengið í gegnum því þeir hafa fært hana á þann stað sem hún er í dag. „Ef þessir hlutir hefðu ekki gerst, væri ég ekki að mála, spá fyrir fólki og gera það sem ég elska. Mér finnst eins og ég sé 10 ára alla daga og ég er með manni sem elskar að ég sé öðruvísi en aðrir og allt þetta glataða var í raun dúlbúin blessun, sem ég er svo þakklát fyrir. Þetta er allt saman frábært, þó að ég óski engum þess að fara í gegnum svona erfiða hluti. En það er í raun ekkert á milli þess að vera fórnarlamb eða sterkur. Maður verður að velja. Ég vel að vera ljón og vera sterk. Alla daga. Stundum er ég alveg að byrja að detta í fórnarlambið, en sem betur fer er ég fljót að stoppa mig af og halda alltaf áfram,” segir Ellý.