Leikarinn Johnny Depp hefur mikið verið milli tannana á fólki undanfarið vegna frægs meiðyrðamáls sem hann höfðaði gegn fyrrverandi eiginkonu sinni, Amber Heard. Depp hafði betur í málinu er kviðdómur féllst á að Amber hafi gerst sek um meiðyrði í grein sem hún ritaði í The Washington Post þar sem hún lét að því liggja að hún væri þolandi heimilisofbeldis og þar með að Depp, sem ekki var nefndur á nafn í greininni, væri gerandi hennar.

Amber þarf nú að greiða Depp gífurlegar fjárhæðir í bætur, en hún hefur þó áfrýjað málinu.

Engu að síður hefur Depp vegna málsins farið frá því að vera útilokaður í samfélagi hinna ríku og frægu yfir í það að vera hálf dáður af nokkuð fjölmennum hóp aðdáenda.

Ákvað Depp að nýta sér meðbyrinn og gaf frá sér listaverkasafn í takmörkuðu upplagi, um 780 verk, sem fóru á sölu á fimmtudag.

Ekki stóð á viðbrögðunum, en verkin seldust upp á örfáum klukkustundum fyrir alls um 3,6 milljónir dala eða rúmar 500 milljónir króna.

Listaverkin voru með þemanu „vinir og hetjur“ og eru í popplistarstíl Þar mátti finna popplistar verk sem sýna stjörnur á borð við Bob Dylan, Keith Richards, Elizabeth Taylor og Al Pacino. Við verkin sótti Depp innblástur til einstaklinga sem hann þekkir og hafa veitt honum innblástur í lífinu.

„Ég hef alltaf notað list til að tjá tilfinningar mínar og til að endurspegla þá sem skipta mig mestu, á borð við fjölskylduna, vinina og fólkið sem ég dáist að. Málverk mín umlykja líf mitt, en ég hef haldið þeim fyrir mig og haldið aftur af mér. Enginn ætti að halda aftur af sér,“ sagði Johnny á upplýsingasíðu fyrir söluaðilann.

Fjárhagsleg staða Depp er nú töluvert betri heldur en þegar hann og Heard skildu en í kjölfar skilnaðarins er talið að hann hafi endað í nokkrum vandræðum og þurfti hann að selja mikið af eignum sínum til að komast yfir lausafé.