Nicole Shanahan, fyrrverandi eiginkona Sergey Brin, sem er einn af stofnendum Google, segir af og frá að hún hafi haldið framhjá fyrrverandi eiginmanni sínum með auðjöfrinum Elon Musk.
Hlið Shanahan í málinu kemur frá lögmanni hennar, Bryan Freedman. „Það að Nicole hafi haldið framhjá með Elon Musk er ekki bara hrein og bein lygi heldur eru ummæli þess efnis ærumeiðing,“ segir Freedman í samtali við Daily Mail.
Wall Street Journal greindi frá því á dögunum að vinátta þeirra Musk og Brin, sem eitt sinn var mikil, sé nú í molum vegna meints framhjáhalds Musk og Shanahan. Brin og Shanahan voru hætt saman en bjuggu þó ennþá saman þegar framhjáhaldið er sagt hafa átt sér stað. Brin sótti um skilnað í janúar á þessu ári og sagði að ágreiningur milli þeirra væri ástæðan fyrir því.
Elon Musk hefur sjálfur stigið fram og þvertekið fyrir sögusagnirnar um framhjáhaldið. Í færslu sem hann birti á Twitter-síðu sinni segir hann fylgjendum sínum meira að segja að hann hafi ekki stundað kynlíf í langan tíma. „Þetta er algjört kjaftæði. Sergey og ég erum vinir og við vorum í partýi saman í gærkvöldi!“ sagði Musk einnig á Twitter. „Ég hef bara séð Nicole tvisvar sinnum síðustu þrjú ár, í bæði skiptin var fullt af fólki í kringum okkur.“