„Þegar dóttir mín var að flýja ofbeldissamband hikaði ég ekki við að bjóða henni að flytja inn til mín og kærasta míns. Það síðasta sem ég átti von á var að hún og kærasti minn myndu hefja leynilegt ástarsamband, beint fyrir framan nefið á mér,“ segir konan.
„Ég er gjörsamlega í áfalli og í ástarsorg. Ég trúi því ekki að fólkið sem ég elska mest myndi svíkja mig svona.“
Konan er 54 ára og kærasti hennar 55 ára. Þau kynntust í gegnum stefnumótaforrit fyrir fjórum árum. „Við náðum strax vel saman og fluttum fljótlega inn saman. Við vorum bæði fráskilin og vildum nýtt upphaf þannig við byggðum hús saman með auka íbúð, sem við leigðum út þar til dóttir mín þurfti á okkur að halda og ég bauð henni að gista þar.“
Dóttir hennar er 25 ára. „Henni virtist líða vel í íbúðinni og fékk nýja vinnu. En síðan vöknuðu grunsemdir og mér byrjaði að líða óþægilega þegar þau voru að grínast fyrir framan mig, oft um eitthvað kynferðislegt – sem mér fannst ekki viðeigandi. Þau voru einnig oft að djóka á minn kostnað og hlógu mikið saman. Þegar ég horfi til baka þá man ég eftir atvikum þar sem þau hurfu tvö saman, eins og eitt skiptið ætluðu þau að sækja mat á veitingastað fyrir okkur öll en voru burtu í klukkutíma og sögðu að það hefði verið mikið að gera.“
Konan segir að það hefði ekkert getað búið hana undir það sem gerðist.
„Ég kom heim úr vinnu til að sjá minnismiða á eldhúsborðinu, miðinn var frá þeim og þau sögðu að þau væru ástfangin og væru saman,“ segir hún..
„Þannig núna er húsið komið á sölu og ég ætla að flytja í burtu. Ég mun aldrei geta fyrirgefið dóttur minni eða maka mínum.“
Deidre hughreystir konuna. „Þetta eru hörmulegar aðstæður, það sem dóttir þín og kærasti gerðu var rangt. En dóttir þín var á viðkvæmum stað eftir að hafa komið sér út úr ofbeldisfullu sambandi og kærasti þinn virðist hafa nýtt sér það,“ segir hún.
„Ég veit að þú ert reið en ekki láta það eyðileggja samband þitt og dóttur þinnar. Hún mun þurfa á þér að halda þegar það óhjákvæmilega gerist og þau hætta saman.
