Rakel var í sambandi með tónlistarmanninum Ingólfi Þórarinssyni um sex ára skeið. Hún nafngreinir hann ekki í viðtalinu en út frá samhengi og frétta fjölmiðla um samband þeirra og sambandsslit í ágúst 2020 er ljóst að hún er að tala um Ingólf, sem almennt er þekktur sem Ingó Veðurguð.
Í viðtali við Vikuna segir Rakel að það hefði verið gríðarlegt áfall þegar mál Ingó rataði í fjölmiðla, þegar hann var ásakaður um að hafa misnotað stöðu sína gagnvart ungum stúlkum og um að hafa brotið á konum.
„Í fyrrasumar, um það bil ári eftir að við hættum saman, vaknaði ég á sunnudagsmorgni og leit á símann minn og þá voru þessar fréttir um hann bara alls staðar. Það var eins og einhver hefði kýlt mig í magann. Ég fékk taugaáfall, grét og grét og náði varla andanum … Þetta var gjörsamlega hræðilegt,“ segir hún.
View this post on Instagram
„Auðvitað hafði alls konar gengið á í okkar sambandi og það var stormasamt á tímabili en ég hafði borið fullt traust til hans og þess vegna var auðvitað erfitt og sárt að heyra af óheiðarleika sem átti sér stað í sambandinu. Við áttum margar góðar stundir saman en vorum samt mikið hvort í sínu lagi því við vorum svakalega ólík og lifðum dálítið hvort okkar lífi; hann að gigga og djamma og ég að hlaupa eða vinna í mínu. Við byrjuðum saman þegar ég var tvítug og hann 27 ára og mér þykir alltaf vænt um hann, því við áttum eitthvað sérstakt. Þrátt fyrir þá bresti sem hann hefur þá er hann góður maður.“
Í júlí í fyrra, þegar tuttugu nafnlausar ásakanir á hendur Ingó litu fyrst dagsins ljós, tjáði Rakel sig á Instagram um málið. Hún sagðist standa með þolendum og ætla að skila skömminni.
Sjá einnig: Rakel María og Ingólfur voru saman í sex ár: Stendur með þolendum og skilar skömminni
Forsíðuviðtal Guðrúnar Ólu Jónsdóttur má lesa í heild sinni í nýjasta tölublaði Vikunnar á vef Birtíngs.