Samm Jane er fimm barna móðir frá Warwickshire í Bretlandi. Fyrir nokkrum vikum fékk hún símtal frá skóla sonar hennar um að hann væri búinn að vera að leggja annan nemanda, stúlku, í skólanum í einelti. Forsvarsmenn skólans sögði henni að hann hefði kallað stúlkuna alls konar ljótum nöfnum og sagt við hana að hún væri feit og ljót.
Samm var miður sín við fréttirnar og bálreið. Þegar drengurinn, sem er 12 ára, kom heim úr skólanum krafðist hún þess að hann myndi opna símann sinn og sýna henni skilaboðin til stúlkunnar.
„Mér datt aldrei í hug að hann myndi verða svona, ég ól hann ekki upp til að koma illa fram við stelpur,“ segir Samm. Kennedy News and Media greinir frá.
„Ég sá skilaboð frá honum til stelpunnar eins og: „Ég vil aldrei sjá ljóta andlitið þitt í skólanum aftur. Þú ert svo ljót og feit.“ Stelpan svaraði honum og sagði: „Hættu að vera svona vondur við mig.“ En hann hélt áfram og sendi henni einnig hljóðklippur,“ segir Samm.
„Ég skalf af reiði. Ég var öskuill. Ég sagði við hann: „Núna mun hún horfa í spegilinn og vera óörugg.“ En ég gat ekki látið kyrrt við liggja,“ segir hún.
Samm var ákveðin að kenna syni sínum lexíu og lagfæra aðstæður eftir bestu getu. Hún fór á stúfana og komst að því hvar stúlkan átti heima og fór þangað með son sinn til að biðjast afsökunar.
„Ég sagði honum að við ætluðum að biðjast afsökunar, en ekki aðeins biðja stúlkuna afsökunar heldur einnig foreldra hennar, frænkur hennar, frænda hennar og bara alla þá sem væru á heimilinu,“ segir hún.
Hún lét hann einnig nota 1600 krónur af vasapeningnum sínum til að kaupa blóm og súkkulaði handa henni.
„Ég lét hann biðjast afsökunar og telja upp allt það sem hann var að biðjast afsökunar á […] Stúlkan tók við afsökunarbeiðninni, hann gaf henni blómin og súkkulaðið og ég sagði: „Hann mun aldrei tala svona við þig aftur.““
Samm deildi sögu sinni á TikTok og hrósuðu netverjar viðbrögðum hennar hástert.
En Samm var hvergi nær hætt. Hún tók einnig tímabundið af honum símann, fartölvuna og PlayStation-tölvuna. „Ég vil að hann geri sér grein fyrir því sem hann gerði rangt, ég vil að hann viti að það séu afleiðingar,“ segir hún.
„Ég er að ala upp karlmann. Sonur minn er ekki með karlkyns fyrirmynd í lífi sínu svo ég verð að kenna honum hvað það merkir að vera karlmaður og ganga úr skugga um að hann sýni fólki virðingu.“
Allt er gott sem endar vel og segir Samm son sinn og stúlkuna vera vini í dag.