Það hefur farið framhjá fáum að raunveruleikastjarnan Kourtney Kardashian og trommarinn Travis Barker gengu í það heilaga á Ítalíu um helgina.
Brúðkaupið var stjörnum prýtt, enda er Kourtney hluti af einni frægustu fjölskyldu í heimi. Systur hennar létu sig að sjálfsögðu ekki vanta – Kim Kardashian, Khloé Kardashian, Kendall Jenner og Kylie Jenner – og móðir þeirra, Kris Jenner. En einn fjölskyldumeðlimur var ekki á staðnum, bróðir þeirra Robert Kardashian.
Samkvæmt heimildarmanni E! News er ástæðan einfaldlega sú að Rob vill halda sig utan sviðsljóssins.
„Rob leið ekki vel með að fara í brúðkaup Kourtney því hann er ekki hrifinn af svona sjónarspili. Þetta er bara ekki eitthvað sem hann fílar, og hann er orðinn mjög prívat manneskja.“
View this post on Instagram
Heimildarmaðurinn tók það fram að það hefði ekkert drama fylgt ákvörðuninni. „Kourtney og öll fjölskyldan skildu þetta algjörlega. Kourtney ætlaðist ekki til þess að Rob myndi mæta og hún veit að hann styður hana sama hvað.“
Þetta ætti ekki að koma aðdáendum fjölskyldunnar á óvart, en Rob hefur verið mjög rólegur á samfélagsmiðlum og forðast myndavélarnar í raunveruleikaþætti fjölskyldunnar undanfarin ár.
„Rob vill halda sig utan sviðsljóssins […] Hann mætir á minni viðburði en vill ekki vera í kringum myndavélarnar og mæta á viðburði eins og brúðkaupið,“ sagði heimildarmaðurinn og bætti við að Rob væri „spenntur að fagna með Kourtney og Travis þegar þau snúa til baka frá Ítalíu.“
Þetta er ekki fyrsta brúðkaupið sem Rob missir af, en hann mætti ekki í brúðkaup Kim og Kanye West árið 2014. Ákvörðun sem hann tók á síðustu stundu fyrir andlega heilsu sína.