Fyrirsætan Kate Moss segir að leikarinn Johnny Depp, sem hún var í sambandi með á tíunda áratug síðust aldar, hafi aldrei hrint henni niður stiga á meðan þau voru saman. Þetta kom fram í stuttum vitnisburði sem hún gaf í meiðyrðamáli sem Depp hefur höfðað gegn fyrrverandi eiginkonu sinni Amber Heard.
Heard hafði í aðilaskýrslu sinni greint frá því að hafa einu sinni kýlt Depp í andlitið því hún taldi að hann væri við það að hrinda systur hennar niður stiga. Þetta hafi hún haldið í ljósi þess að hann hafi hrint Moss á sínum tíma.
Moss sagði að hún hefði fallið niður stiga þegar hún og Johnny Depp voru saman í fríi á Jamaíka og hafi Depp í kjölfarið hjálpað henni upp og hlúð að henni.
„Við vorum á leið úr herberginu, Johnny fór á undan mér, og það hafði rignt. Þegar ég fór út þá rann ég í stiganum og meiddist á baki. Ég öskraði því ég vissi ekki hvað hefði komið fyrir og ég fann til. Hann kom hlaupandi til baka til að aðstoða mig og bar mig aftur upp í herbergi og náði í læknisaðstoð fyrir mig.“
Moss sagði að á þeim fjórum árum sem þau voru saman hafi Depp aldrei beitt hana ofbeldi.
„Hann ýtti mér aldrei, hann sparkaði ekki í mig og hann hrinti mér ekki niður stiga.“