Útvarpsmaðurinn Siggi Hlö heldur úti einum vinsælasta útvarpsþætti landsins alla laugardaga og slær hvergi af. Þátturinn, Veistu hver ég var, er á dagskrá Bylgjunnar alla laugardaga milli 16.00 og 18.30 og er vinsælt hjá mörgum hlustendum að stíga sín fyrstu skref inn í gleði næturinnar með því að hlusta á þáttinn.
Þá er enn vinsælla að hringja inn í þáttinn, helst í sumarbústað úti á landi, og spjalla við Sigga sem tekur slíkum innihringingum ætíð fagnandi.
Innihringjandi í þætti dagsins hefur slegið í gegn á samfélagsmiðlinum Twitter. Um er að ræða upptöku þar sem kona ein hringir inn og er ekki alveg með athyglina við símtalið þegar hún nær í gegn.
„Þú tekur upp allt sem maður gerir,“ segir konan við einhvern nærstaddan og hlustar ekkert á Sigga sem reynir að ná athygli hennar. Þá skipar hún viðkomandi að haga sér.
Loks nær þáttastjórnandinn reyndi athygli konunnar sem gargar upp fyrir sig. „NEI BLESSAÐUR!!“ segir konan og tekur Siggi undir kveðjuna. „Eru ekki allir hressir?“ spyr konan þá og virðist vera í miklu stuði.
„Hvað helduru að hafi komið fyrir mig núna, ha?“ segir konan og þegar Siggi segist ekki hafa hugmynd bætir hún við: „Allsnakin í pottinum með þremur karlmönnum“.
Í kjölfarið slitnar samtalið og segir Siggi að það hafi verið eins gott enda leist honum ekkert á hvert samtalið væri að fara.
ég hef sjaldan, ef ekki aldrei, grátið úr hlátri yfir útvarpi áður #smásálin pic.twitter.com/UAB3YuSWHr
— Starkaður Pétursson™ (@starkadurpet) March 19, 2022