Bandarísk móðir, Jamie Gooch, hefur varað aðra foreldra við því að leyfa börnunum sínum að horfa á Disney-myndina Hocus Pocus 2, en hún telur að myndin geti „kallað helvíti“ yfir heimili. Independent greinir frá.

Jamie var í viðtali við KWTX og varaði þar við áðurnefndri mynd, sem er framhaldsmynd af dáðri hrekkjavökumynd – Hocus Pocus sem kom út árið 1993.  „Það versta sem getur gert – Þú kallar helvíti yfir börnin ykkar og heimili,“ sagði Jamie. „Öll myndin snýst um það að nornir eru að nýta börn sem blóð fórnir.“

Myndin fjallar líkt og fyrri myndin um hóp ungmenna sem reyna að koma í veg fyrir að þrjár nornir nemi á brott börn í borginni Salem og skaða þau.

Jamie sagði að áhorfendur viti ekki hverju þeir eru að bjóða heim þegar þeir kveikja á myndinni sem er sýnd á Disney+.

„Ekki horfa á þessa mynd. Allir halda að þetta sé í þykjustunni og saklaust, en þau gætu verið að leggja öll þau álög sem þeim langar til og allt gæti verið að koma í gegnum sjónvarpsskjáinn og inn í stofu til ykkar.“

Jamie sagðist sjálf passa vel upp á öryggi heimilis síns og þess vegna passi hún vel á hvað er horft.

„Ég elska að skapa öruggt umhverfi fyrir fjölskyldu mína og vini til að vera í. Ég trúi að allt hefjist hér, þetta hefst allt á heimilinu. Svo verið varkár – verið varkár með hvað við erum að koma með inn á heimilin okkar og inn í hversdagslífið.“

Hún tók einnig fram að fjölskylda hennar hafi ekki haldið upp á hrekkjavöku hátíðina í um 4-5 ár því Jamie geti ekki ímyndað sér að berskjalda börnin sín fyrir slíkum myrkraverkum og gjarnan fylgi fögnuðinum. Hún segist vera kristin og það þýði að hún þurfi að fara eftir strangari kröfum í lífinu en margir aðrir.

Hún fór í áðurnefnt viðtal eftir að hafa deilt færslu á Facebook þar sem hún hvatti mæður til að huga að söguþræðinum í Hocus Pocus 2.

„Sem mæður erum VIÐ verndarar heimila okkar. Sem þýðir að allt þar þrífst er þar því VIÐ höfum leyft það. Hvað er að gerast þegar við horfum á þessar myndir? Hverju erum við að opna huga okkar fyrir? Hvað erum við að bjóða velkomið inn á heimili fjölskyldna okkar?“

Rétt er að taka fram að Hocus Pocus 2 er fjölskyldumynd og er nú aðgengileg Íslendingum á Disney+. Hugsið ykkur bara vel um áður en þið ýtið á „PLAY“.