Myndband frá Lois Saunders varð „viral“ á TikTok eftir að hún lagði mikið á sig til að komast að því hvort kærastinn hefði haldið framhjá henni eða ekki – og fólki finnst viðbrögð hennar ýmist vera algjör snilld eða hrein klikkun.
Lois var heima hjá kærastanum þegar hún tók eftir því að undir fataskápnum hans leyndist ónotaður túrtapp í gulum umbúðum og maskari, en hvorugt tilheyrði henni.
Þegar hún spurði kærastann um túrtappann og maskarann sagðist hann ekkert kannast við þessa hluti og skildi ekki hvernig þeir hefðu komist þangað.
Þetta vakti grunsemdir hjá Lois sem ákvað að rannsaka málið sjálf.
Hún deildi frásögn af rannsókninni á TikTok þar sem hún er með notendanafnið @loissa4. Þar sagði hún meðal annars: „Þegar þú finnur túrtappa og maskara undir fataskápnum hjá kærastanum þínum og hann neitar öllu, þá þarft þú sjálf að rannsaka málið.“
Í myndbandinu, sem búið er að horfa á yfir 4 milljón sinnum á aðeins sólarhring, segir Lois frá því að hún hafi haft samband við fyrirtækið Tampax sem framleiðir túrtappana til að komast að því hvenær þessi túrtappi hefði verið framleiddur.
Hún fékk snögg og greinargóð svör frá Tampax þess efnis að túrtappinn hefði verið framleiddur þann 11. desember 2019, sem var áður en hún og kærastinn byrjuðu saman.
Kærasti Lois sagði í framhaldinu að hann grunaði að kvenkyns stúdent sem leigði herbergið á undan honum hefði óvart skilið þetta eftir.
Þegar hafa verið skrifaðar yfir fimm þúsund athugasemdir við myndbandið þar sem fólk ýmist lofar Lois fyrir útsjónarsemina eða segir hana hreinlega klikkaða.
Ein skrifar að starfsmaðurinn hjá Tampax sem svaraði henni svona vel eigi skilið að fá launahækkun. Önnur segir: „Ef hann á ekki systur, þetta eru ekki þínar eigur og þið voruð byrjuð að hittast fyrir desember 2019 þá er gaurinn sekur!“
@loissa4##tampax had my back 👯♬ original sound – Lois Sa