Í gær, miðvikudaginn 26. janúar, voru tvö ár liðin frá andláti körfuboltagoðsins Kobe Bryant. Bryant fórst í hræðilegu þyrluslysi ásamt 13 ára dóttur sinni, Gianna, og sjö öðrum farþegum og má með sanni segja að þögn hafi slegið á heimsbyggðina þegar tíðindin spurðust út.

Í minningu hinna látnu tók listamaðurinn Dan Medina sig til og bjó til fallega bronsstyttu að Kobe og Giönnu, þar má sjá dótturina horfa aðdáunaraugum á föður sinn með körfubolta undir hendinni en stúlkan sjálf þótti afar efnileg í íþróttinni. Á undirstöðum styttunnar er svo platti með nöfnum þeirra sem einnig fórust í slysinu.

Medina fékk leyfi til þess að koma styttunni fyrir á slysstaðnum í fjallshlíð nærri Calabasas-borg í Kaliforníu-ríki þennan eina dag. Hún hefur nú þegar verið fjarlægð af vettvangi en listamaðurinn vonast til þess að í framtíðinni fái hún varanlegan sess á þessum stað. Á meðan hyggst hann ár hvert flytja styttuna á slysstaðinn á þessum degi til að minnast hinna látnu og að auki á afmælisdegi Bryant, 23. ágúst.