Naomi Kutin varð þekkt sem „súperstelpan“ eða „Supergirl“ þegar hún var aðeins níu ára gömul. Hún var titluð sem „sterkasta stúlka í heimi“ þegar hún sló heimsmet fyrir að lyfta 97 kílóum í hnébeygju.
Ellefu ár eru liðin og hún orðin fullorðin.
Naomi er frá New Jersey í Bandaríkjunum og byrjaði að lyfta þegar hún var átta ára gömul til að verja meiri tíma með pabba sínum.
Nokkrum mánuðum seinna sló hún heimsmet þegar hún lyfti 97 kg í þyngdarflokki -43 kg kvenna, hún var þá sjálf 39 kg.
Þetta var magnaður árangur, konan sem var með fyrra heimsmetið var 44 ára þýsk kona.
Árangur Naomi vakti heimsathygli og var gerð heimildarmynd um hana á PBS, í myndinni var fylgst með daglegu lífi hennar sem strangtrúaður gyðingur (e. Orthodox Jewish) og ung stúlka að keppa við hlið fullorðinna einstaklinga.
Naomi mátti ekki keppa á laugardögum, þar sem það er sabbatsdagur, hvíldardagur í gyðingdómi. Venjulega keppa konur á laugardögum en Naomi fékk að lyfta á sunnudögum ásamt körlunum.
Naomi er enn að lyfta, nú við Rutgers háskóla, en æfir enn reglulega með föður sínum.
Kraftlyftingarkonan er dugleg að deila æfingum á Instagram.