Rapparinn Kanye West, sem kallar sig „Ye“ í dag, varpaði nokkrum sprengjum varðandi skilnað sinn og Kim, ásamt mörgu öðru, í viðtali hjá Hollywood Unlocked á dögunum. Þar kom hann með ýmsar staðhæfingar, eins og hvernig samskiptum þeirra er háttað í dag, að það sé til annað kynlífsmyndband af Kim og um samband hennar og Pete Davidson.
Kim skaust upp á stjörnuhimininn þegar þátturinn Keeping Up With The Kardashians var frumsýndur í október árið 2007. Nokkrum mánuðum eftir frumsýninguna var kynlífsmyndbandi lekið á netið af Kim og Ray J stunda kynlíf, sem vakti heimsathygli.
Í viðtali Hollywood Unlocked gaf Kanye í skyn að það væri til annað kynlífsmyndband af Kim og Ray J. Hann sagðist hafa ferðast með flugvél til að ná í fartölvu með meintu myndbandi.
„Ég fór sjálfur og fékk fartölvuna frá Ray J. Ég hitti þennan mann á flugvellinum […] og fór til baka og lét hana fá þetta klukkan átta um morguninn og hún fór að gráta þegar hún sá það,“ sagði Kanye um myndbandið.
Hann sagði að ástæðan fyrir því að hún hefði farið að gráta væri því myndbandið „sýndi að fólk hefði ekki elskað hana bara séð hana sem vöru.“
Fulltrúi Kim tekur fyrir staðhæfingu Kanye í samtali við E! News og segir að það sé ekki til annað kynlífsmyndband.
„Eftir að hafa skoðað myndbandið þá er ekkert kynlífstengt í því. Aðeins myndband úr flugvélinni á leiðinni til Mexíkó, og myndefni frá skemmtistaðnum og veitingastaðnum frá sama ferðalagi,“ segir fulltrúinn.
„Kim trúir því staðfastlega að það sé ekki til annað kynlífsmyndband. Það eru 20 ár liðin og hún vill ljúka þessum kafla og einblína frekar á það jákvæða sem hún gerir sem móðir, frumkvöðull og talsmaður fyrir umbótum á réttarkerfinu.“
