Það getur allt gerst í beinni útsendingu eins og fréttakonan Tori Yorgey komst að síðastliðið miðvikudagskvöld.
Hún var á vettvangi fyrir sjónvarpstöðina WSAZ-TV, í Dunbar í Vestur-Virginíu í Bandaríkjunum, að ræða við fréttaþulinn Tim Irr um bilun í vatnsveitu þegar bíll keyrði á hana.
„Guð minn góður, bíll keyrði á mig, en ég er í lagi. Ég er í lagi. Svona er að vera í beinni. Þetta er allt í góðu,“ sagði hún.
Sjáðu myndbandið hér að neðan.
„We’re good, Tim.“ pic.twitter.com/9kn2YElDLK
— Timothy Burke (@bubbaprog) January 20, 2022
Tori sagði að þetta hefði ekki verið í fyrsta skipti sem bíll keyrir á hana. Hún ræddi aðeins við bílstjórann sem baðst afsökunar. „Þú ert indæl og í lagi. Þetta er allt í góðu,“ sagði Tori, allan tíman í beinni útsendingu.
Fréttakonan greindi frá því að þetta væri síðasta vikan hennar í starfinu og því týpískt að eitthvað svona myndi gerast.
Í samtali við NBC News sagði Tori að henni liði ágætlega en væri smá aum. „Ég er búin að láta kíkja á mig. Engin brotin bein en verð aum í smá tíma,“ segir hún.