Foreldrar ungra barna þekkja eflaust flestir vel lagið Let It Go úr Disney-myndinni Frozen sem sló eftirminnilega í gegn þegar hún kom út árið 2013. Let It Go náði fimmta sætinu á Billboard Hot 100 listanum í apríl 2014 og hefur verið sungið á flestum barnaheimilum svo oft að mörgum þykir nóg um.
Nú er komið nýtt Disney-lag sem hefur slegið vinsældametið. Lagið We Don´t Talk About Bruno úr myndinni Encanto er orðið vinsælasta lag úr Disney-mynd fyrr og síðar.
Lagið er samið af tónskáldinu Lin-Manuel Miranda sem samdi söngleikinn Hamilton sem sló eftirminnilega í gegn. Hann samdi líka tónlistina fyrir Disney-myndina Moana og var tilefndur til óskarsverðlauna fyrir lagið How Far I´ll Go.
We Don´t Talk About Bruno var streymt um 29 milljón sinnum bara í síðustu viku og hefur náð fjórða sætinu á Billboard Hot 100 listanum.
Encanto fjallar um Madrigal-fjölskylduna sem býr í fjöllum Kólumbíu. Allir fjölskyldumeðlimir búa yfir einhvers konar ofurkröftum nema Mirabel. Þegar hún kemst að því að hætta stafar að fjölskyldunni sýnir hún að ofurkraftar eru ekki endilega það sem mestu máli skiptir. En hver er eiginlega þessi Bruno?
Myndin er komin á Disney+ streymisveituna. Hér er síðan hægt að hlýða á lagið vinsæla.