Áhugaverðar umræður hafa skapast eftir að tæplega 180 milljón króna eign var auglýst til sölu en ekki var haft fyrir því að fara út með ruslið áður en auglýsingamyndir fyrir fasteignina voru teknar.
Fasteignaverð er sem kunnugt er í hæstu hæðum, algengt að eignir seljist á yfirverði og jafnvel án þess að nokkur hafi komið að skoða. Þá er framboð eigna afar lítið.
Átta herbergja einbýlishús að Tjarnargötu í Reykjavík er hér auglýst á fasteignavef Vísis.
Arnar nokkur gerir það að umtalsefni á Twitter að það segi „allt sem segja þarf um núverandi fasteignamarkað að fasteignasalar og eigendur sjá ekki einu sinni þörfina á að fara út með ruslið fyrir myndatöku á 180 m.kr. eign“ og birtir hann skjáskot af einni myndinni sem tekin er í eldhúsinu þar sem þrír fullir ruslapokar sjást greinilega. Þegar þessar línur eru skrifaðar hafa tæplega 700 manns sett hjarta við færsluna.
Þórunn Jakobs vekur síðan athygli á því að á eldhúsborðinu er óhreint eldfast mót, og Sveinn Birkir á því að þarna er pottur á eldavélarhellu. Einhverjir eru síðan forvitnir um hvað hafi verið í matinn og hvaða hlutverki sítrónupiparinn á borðinu hafi gegnt.
Bragi Skúlason lætur sér hins vegar fátt um finnast og spyr bara: „Rusl? Hvaða rusl?“
Eigendur hússins mega allavega eiga það að þeir eru ekki að reyna að búa til neina glansmynd.
Rusl? Hvaða rusl?
— Bragi Skúlason (@skulasonb) January 17, 2022