Þau hörmulegu tíðindi bárust á Gamlársdag að hin elskaða leikkona Betty White væri látin 99 ára að aldri. Margir voru harmi slegnir enda átti leikkonan aðeins fáeinar vikur eftir í stóra 100 ára afmælið.
Þær sögur hafa gengið um andlát leikkonunnar að það hafi orðið í kjölfar bólusetningar við COVID-19, en umboðsmaður og náinn vinur Betty, Jeff Witjas hefur reynt að kveða þann orðróm niður – enda fjarri sannleikanum.
„Fólk er að segja að andlát hennar sé tengt örvunarskammti sem hún hafi fengið þremur dögum áður en hún dó. Það er rangt. Hún lést af náttúrulegum orsökum,“ sagði Jeff í yfirlýsingu þann 3. janúar. „Andlát hennar ætti ekki að vera notað í áróðursskyni – það er ekki í anda við lífið sem hún lifði.“
Jeff fór yfir að Betty hafi verið dásamleg kona og hennar verði minnst fyrir arfleifð hennar sem dýravinur og aktívisti.
Yfirvöld hafa nú opinberað að Betty lést í svefni í kjölfar heilablæðingar sem hún fékk sex dögum áður en hún lést.